وزیراعظم نریندر مودی نے رواں مالی سال کی دوسری سہ ماہی میں مجموعی گھریلو پیداوار (جی ڈی پی) میں زبردست اضافہ سے متعلق اعداد و شمار کو حوصلہ افزا قرار دیتے ہوئے کہا ہے کہ یہ مرکز کی پالیسیوں اور اصلاحات کے مثبت نتائج کی عکاسی کرتے ہیں۔

وزیراعظم نریندر مودی نے رواں  مالی سال کی دوسری سہ ماہی میں مجموعی گھریلو پیداوار (جی ڈی پی) میں زبردست اضافہ سے متعلق اعداد و شمار کو حوصلہ افزا قرار دیتے ہوئے کہا ہے کہ یہ مرکز کی پالیسیوں اور اصلاحات کے مثبت نتائج کی عکاسی کرتے ہیں۔ 
مرکزی شماریاتی دفتر کی طرف سے جمعہ کو جاری اعداد و شمار کے مطابق جولائی-ستمبر ۲۰۲۵ء کی سہ ماہی میں جی ڈی پی میں سالانہ بنیاد پر۲ء۸؍ فیصد اضافہ درج کیا گیا، جو گزشتہ چھ سہ ماہی میں سب سے زیادہ ہے۔ رواں مالی سال کی پہلی ششماہی (اپریل- ستمبر)  میں جی ڈی پی کی شرح ترقی آٹھ فیصد رہی۔ مرکزی وزیرِ خزانہ نرملا سیتارمن اور تجارت و صنعت کے وزیر پیوش گوئل نے بھی اس مضبوط شرحِ نمو کی تعریف کی ہے۔ 
مودی نے سوشل میڈیا پلیٹ فارم ایکس پر لکھا کہ ’’مالی سال ۲۶۔۲۰۲۵ءکی دوسری سہ ماہی میں۲ء۸؍ فیصد جی ڈی پی شرح میں اضافہ انتہائی حوصلہ افزا ہے۔ یہ ہماری ترقی کے موافق  پالیسیوں اور اصلاحات کے اثرات کو ظاہر کرتی ہے۔ یہ ملک کے عوام کی محنت اور کاروباری صلاحیت کا بھی اظہار ہے۔ ہماری حکومت اصلاحات کو فروغ دینے اور ہر شہری کے لیے زندگی کو آسان بنانے کے لیے کوشاں رہے گی۔   سیتارمن نے ایکس پر لکھا کہ آج جاری جی ڈی پی کے اعداد و شمار ہندوستانی معیشت کی مضبوطی اور اس کی رفتار کو ظاہر کرتے ہیں۔ انہوں نے کہا کہ ہندوستان دنیا کی سب سے تیزی سے بڑھنے والی بڑی معیشت ہے۔ 

یہ بھی پڑھئے:تنوی شرما کا ڈریم رن جاری، اُنتی ہڈا اور کِدامبی سری کانت بھی سیمی فائنل میں پہنچے

وزیر مالیات  کے مطابق اس ترقی کا سبب مستقل مالی نظم و ضبط، ہدف پر مبنی سرکاری سرمایہ کاری اور متعدد اصلاحات ہیں جن سے پیداواری صلاحیت میں اضافہ ہوا اور کاروبار کرنے میں آسانی پیدا ہوئی۔ وزیرِ خزانہ نے کہا کہ مرکز کی این ڈی اے حکومت اس رفتار کو برقرار رکھنے اور طویل مدتی اقتصادی ترقی کے لیے ضروری اصلاحات کو آگے بڑھانے کے لیے پرعزم ہے۔ 

یہ بھی پڑھئے:عامر خان نے کہا کہ دھرمیندر نے موت سے قبل سنی دیول کی آنے والی فلم ’’لاہور ۱۹۴۷ء‘‘ دیکھی

مرکزی وزیر پیوش گوئل نے ایکس پر اپنی پوسٹ کے ساتھ جی ڈی پی سے متعلق سرکاری پریس ریلیز کا لنک بھی شیئر کیا۔ انہوں نے اپنے پوسٹ کا عنوان رکھا ’’ہندوستان کی ترقی کی رفتار تیز ہوئی ۔‘‘ انہوں نے لکھا کہ مینوفیکچرنگ، تعمیرات، رئیل اسٹیٹ اور پروفیشنل سروسز جیسے شعبے پیداواری صلاحیت بڑھانے اور ایک متحرک معاشی ماحول تیار کرنے میں اہم کردار ادا کر رہے ہیں۔ ان کے مطابق یہ بہترین کارکردگی وزیراعظم نریندر مودی کی قیادت میں پالیسیوں کے استحکام اور مسلسل جاری رہنے کا نتیجہ ہے جو طویل مدتی استحکام اور ترقی کو تقویت دے رہا ہے۔