منوج جرنگے کے مراٹھا ریزرویشن احتجاج کے معاملے پر کانگریس لیڈر وجے وڈیٹیوار نے ریاستی حکومت پر سخت حملہ کیا ہے۔ انہوں نے سخت برہمی کا اظہار کرتے ہوئے کہا کہ ’’حکومت کو مراٹھا برادری کو انصاف فراہم کرنا چاہیے، لیکن جرنگے کے سامنے جھک کر او بی سی سماج کا نقصان کیوں کررہے ہیں؟‘‘

منوج جرنگے کے مراٹھا ریزرویشن احتجاج کے معاملے پر کانگریس لیڈر وجے وڈیٹیوار نے ریاستی حکومت پر سخت حملہ کیا ہے۔ انہوں نے سخت برہمی کا اظہار کرتے ہوئے کہا کہ ’’حکومت کو مراٹھا برادری کو انصاف فراہم کرنا چاہیے، لیکن جرنگے کے سامنے جھک کر او بی سی سماج کا نقصان کیوں کررہے ہیں؟‘‘ ناگپور میں پریس کانفرنس میں انہوں نے مراٹھا-او بی سی ریزرویشن، جرنگے کے خلاف بدعنوانی کے الزامات، مراٹھواڑہ میں خشک سالی، اور ناگپور میں بگڑتے ہوئے امن و امان کے موضوعات پرریاستی حکومت کو آڑے ہاتھوں لیا۔  ریزرویشن کے مسئلہ پر بات کرتے ہوئے وڈیٹیوار نے کہا، ’’مراٹھا برادری کو انصاف ملنا چاہیے، ہم کبھی اس کے مخالف نہیں رہے۔ تاہم، ایک برادری کو انصاف دینے کے لئے دوسری برادری کے آئینی حقوق پر سمجھوتہ نہیں کیا جانا چاہیے۔ یہ حقیقت ہے کہ اس حکومت نے او بی سی سماج کو نقصان پہنچایا ہے۔ ۳۷۸ ؍او بی سی ذاتوں میں سے ۲۰۰؍ذاتوں کے لوگوں کی فی کس آمدنی ۲؍ہزار روپے سے کم ہے۔

یہ بھی پڑھئے:بلڈانہ: ضلع پریشد اردو اسکول کی انوکھی پہل، ’’میرے اسکول میں خوبصورت جماعت‘‘ مہم کا اعلان

اگر حکومت او بی سی کو صرف اس لیے نقصان پہنچا رہی ہے کہ کسی نے سڑکوں پر طاقت کا مظاہرہ کیا، تو عوام انہیں کبھی معاف نہیں کریں گے۔‘‘ منوج جرنگے کے احتجاج پر شبہ ظاہر کرتے ہوئے وڈیٹیوار نے بہت سنگین الزامات لگائے۔ انہوں نے کہا کہ ’’جرنگے پاٹل کے قریبی شخص کو محکمہ آبی وسائل سے ہزاروں کروڑ روپے کے پروجیکٹ ملے تھے۔ وزیر اعلیٰ نے ان کاموں کو روک دیا تو جرنگے پاٹل نے وزیر اعلیٰ کو برا بھلا کہا؟ کیا وہ اسی غصے میں ممبئی کیلئے  روانہ ہوئے تھے؟ اور اب بھوک ہڑتال اچانک ملتوی ہونے کے پیچھے حکومت اور جرنگے پاٹل کے درمیان اصل میں کیامعاہدہ ہوا ہے؟‘‘ وڈیٹیوار نے خشک سالی کے مسئلہ پر حکومت کو تنقید کا نشانہ بنایا۔ انہوںنے کہا کہ اس سال بھی مراٹھواڑہ میں بارش کی شدید کمی سے فصلیں خطرے میں ہیں اور چارے کا مسئلہ بھی سنگین ہو گیا ہے۔