گوگل جیمینائی کئی ممالک میں رکاوٹ کا شکار، جس کے بعد صارفین نے دھیمی رفتار، اور غلط جوابات کی شکایت کی، ہندوستان، برطانیہ، یورپ اور ایشیا میں مسائل سامنے آئے، جبکہ گوگل نے اب تک کسی بندش کی تصدیق نہیں کی۔

جمعرات کو متعدد ممالک میں گوگل کے مصنوعی ذہانت کے چیٹ بوٹ ’’جیمینائی‘‘ کے صارفین کو مسائل کا سامنا کرنا پڑا۔ خلل سے متعلق مانیٹرنگ پلیٹ فارمز پر غلطیوں، سست روی، اور مصنوعی ذہانت کے جوابات نہ ملنے کی شکایات میں اچانک اضافہ درج کیا گیا ہے۔ڈاؤنڈیٹیکٹر کے مطابق،  متحدہ عرب امارات کے وقت کے مطابق شام ۴؍ بج کر ۴۴؍ منٹ کے قریب گوگل جیمینائی میں مسائل کا اشارہ آنا شروع ہوا۔ جبکہ ہندوستان میں اس کی سروس ’’ممکنہ مسائل‘‘ کا انتباہ دکھا رہی تھی، جہاں صارفین ایپ، ویب سائٹ اور دیگر جیمینائی فنکشنز میں خرابیوں کی اطلاع دے رہے تھے۔ایک اور بندش کی نگرانی کرنے والی سروس ’’ڈاؤن فار ایوری ون اور جسٹ می‘‘ نے کہا کہ اس نے جیمینائی میں تقریباً ایک گھنٹہ قبل شروع ہونے والے مسائل کو شناخت کیا ہے۔ 

یہ بھی پڑھئے: کنیڈا کے برٹش کولمبیا میں نمودار ہونے والا پراسرار جزیرہ چند ہفتوں بعد ہی غائب!

بعد ازاں متعدد ممالک سے رپورٹس موصول ہو رہی ہیں، جس سے ظاہر ہوتا ہے کہ یہ خلل کسی ایک بازار تک محدود نہیں ہے۔برطانیہ، ہندوستان، فرانس، بیلجیم، ترکی، اردن، جارجیا، یونان، اسپین، سنگاپور، انڈونیشیا، ویتنام اور سوئٹزرلینڈ کے صارفین ان مسائل کی اطلاع دینے والوں میں شامل ہیں۔زیادہ تر شکایات میں صارفین کو جیمینائی استعمال کرنے کی کوشش کے دوران غلطیاں موصول ہونے کا ذکر کیا گیا۔ کچھ نے سست کارکردگی اور جیمینائی API میں مسائل کی بھی اطلاع دی۔ 
علاوہ ازیں ہندوستان میں، ڈاؤنڈیٹیکٹر سروس کے ساتھ ممکنہ مسائل دکھا رہا تھا۔ جمعرات کو شائع ہونے والی ایک علاحدہ رپورٹ میں کہا گیا کہ صارفین کو جیمینائی ایپ، مصنوعی ذہانت سے تخلیق، لاگ ان، ویب سائٹ تک رسائی اور تاخیر (لیٹنسی) سے متعلق دشواریوں کا سامنا ہے۔تاہم یہ خلل تمام جیمینائی صارفین کو متاثر نہیں کر رہا، جس سے اندازہ ہوتا ہے کہ مسئلہ وقفے وقفے سے ہو سکتا ہے یا صرف مخصوص خطوں یا سروس کے حصوں تک محدود ہے۔

یہ بھی پڑھئے: بیت المقدس: اگست میں مسجد الاقصیٰ پر ۵۲۰۹؍ اسرائیلی آبادکاروں کے حملے

دریں اثناء متحدہ عرب امارات میں بڑے پیمانے پر بندش کا کوئی واضح اشارہ نہیں ہے۔ڈاؤنڈیٹیکٹر کے UAE صفحے پر اب بھی ’’گوگل جیمینائی کے ساتھ فی الحال کوئی مسئلہ نہیں‘‘ظاہر ہو رہا تھا، حالانکہ دیگر مقامات سے رکاوٹ کی خبریں سامنے آرہی تھیں۔ جبکہ اس کا مطلب یہ ہو سکتا ہے کہ UAE کے صارفین کم متاثر ہوئے ہیں، یا یہ کہ مقامی خبروں کی تعداد اس حد تک نہیں پہنچی جس پر مانیٹرنگ سروس کوئی رکاوٹ ظاہر کرے۔ مزید برآں گوگل نے ابھی تک عوامی سطح پر صارفین کے لیے جیمینائی کی وسیع پیمانے پر رکاوٹ کی تصدیق نہیں کی ہے اور نہ ہی درج کردہ مسائل کی وجہ بتائی ہے۔
 گوگل کے کلاؤڈ سروس ہیلتھ ڈیش بورڈ پر صارفین کی رپورٹس سے مماثل کوئی نیا وسیع جیمینائی رکاوٹ نہیں ظاہر کی گئی ہے۔ جبکہ کمپنی کی واقعات کی تاریخ سے پتہ چلتا ہے کہ جیمینائی سے متعلق خدمات کو ماضی میں رکاوٹ اور غلطیوں کا سامنا رہا ہے۔دیگر مانیٹرنگ سروسز نے بھی مخلوط صورت حال ظاہر کی، جن میں سے کچھ صارفین کی بڑھتی ہوئی شکایات کے باوجود جیمینائی خدمات کو فعال قرار دیتی رہیں۔ واضح رہے کہ یہ تازہ ترین خلل ایسے وقت میں آیا ہے جب کہ گوگل اپنی مصنوعات میں جیمینائی کو وسعت دینے اور اپنے مصنوعی ذہانت کے ماڈلز کے نئے ورژن جاری کرنے کا سلسلہ جاری رکھے ہوئے ہے۔