مدھیہ پردیش میں گورنر نے سرکاری پروگرام میں  جے شری رام کے نعرے لگوائے، نہ لگانے والوں کو دھمکایا

سیکولر ہندوستان  کی ریاست مدھیہ پردیش کے گورنر منگو بھائی پٹیل نے جمعہ کو ایک سرکاری پروگرام میں نہ صرف خود جے شری رام کے نعرے لگوائے بلکہ جواب میں آواز کم آنے پر دھمکی بھی دی کہ وہ دیکھ رہے ہیں کہ کون لوگ نعرہ نہیں  لگارہے ہیں۔  یہ واقعہ جمعرات کا ہے جس کاویڈیو منظر عام پر آگیا ہے۔گورنر آگر مالوا کے لسولڈیا گوپال گاؤں  کے سرکاری اسکول میں موجود تھے۔ یہاں  وہ ہیلتھ کیمپ، آنگن واڑی مرکز اور پی ایم آواس یوجنا کے تحت تعمیر ہونےوالے گھروں کودیکھنے آئے تھے۔  اس دوران انہوں نے یہاں  ’’با با بیج ناتھ مہادیو مندر‘‘ میں ماتھا بھی ٹیکا۔  اسکول میں  منعقدہ پروگرام کا جو  ویڈیو دینک بھاسکر نے اپنی ویب سائٹ پر جاری کیا ہے،اس  میں دیکھا جا سکتاہے کہ گورنر منگو بھائی پٹیل پروگرام کے دوران اسٹیج سے جے شری رام کا نعرہ بلند کرتے ہیں۔  جواب میں وہ جوش  نظر نہ آنے پر وہ اسٹیج  سے یہ بھی کہتے ہوئے سنے جاسکتے  ہیں کہ ’’کون نہیں بول رہاہے، یہاں پر مجھے سب دکھائی دے رہاہے۔‘‘ دینک بھاسکر کے مطابق اس  نے اس سلسلے میں گورنر ہاؤس سے رابطہ کیا ہے مگر کوئی جواب  نہیں ملا ہے۔  واضح رہے کہ گورنر کی حیثیت سے سرکاری پروگرام کے دوران منو بھائی پٹیل کا یوں  مذہبی نعرے بلند کرنا قابل اعتراض ہے۔