پاکستان کو بے نقاب کرنے کیلئے حکومت کئی آل پارٹی وفد الگ الگ ملکوں میں بھیجے گی، ۳۰؍ سے زائد اراکین پارلیمان کی شمولیت متوقع

 ’آپریشن سیندور‘ کی کامیابی کے بعد حکومت ہند نے سفارتی محاذ پر بھی پاکستان کو پٹخنی دینےکافیصلہ کیا ہے۔  پاکستان کی سرزمین سے ہندوستان  میں ہونے والی   دہشت گردی  سے عالمی برادری کو آگاہ کرنےا وراسلام آباد کو بے نقاب کرنےکیلئے مرکزی حکومت نے کئی کل جماعتی وفد دنیا بھر میں بھیجنے کافیصلہ کیا ہے۔  ابھی یہ واضح نہیں  ہے کہ کل کتنے وفد کن کن ممالک کا دورہ کریں گے تاہم ذرائع کے مطابق حکومت  مختلف پارٹیوں کے  ۳۰؍ سے زائد  اراکین  پارلیمان کی خدمات حاصل کریگی۔ 
آئندہ ہفتے سے وفود کی روانگی متوقع
 حکومت نے یہ فیصلہ آپریشن سیندو ر کے تناظر میں ہندوستان کے بیانیہ کوتقویت پہنچانے اور پاکستان کے ذریعہ مسئلہ کشمیر کو بین الاقوامی رنگ دینے کی کوششوں کا مقابلہ کرنے کیلئے کیا ہے۔  وزارت  برائے  امور خارجہ کے تعاون سے    وفود کی روانگی کا سلسلہ آئندہ ہفتے سے شروع ہونے کی توقع ہے۔  یہ پہلا موقع ہے جب ہندوستانی حکومت کشمیر اور سرحد پار سے  دہشت گردی جیسے  سیکوریٹی کےحساس معاملے پر قومی موقف کو فروغ دینے کیلئے اراکین پارلیمنٹ کے کثیر الجماعتی وفد کو  استعمال کر رہی ہے۔ 
کن لیڈروں کی شرکت متوقع ہے؟
  حالانکہ ابھی  وفود کی تیاریوں سے متعلق کوئی تفصیل عام نہیں کی گئی ہے تاہم ذرائع کے حوالے سے ملنےوالی اطلاعات کے مطابق  جن اراکین پارلیمان کو مذکورہ وفود میں شامل کیا جاسکتاہے ان میں کانگریس سے ششی تھرور، منیش تیواری، سلمان خورشید اور امرسنگھ کے نام سرفہرست ہیں جبکہ بی جےپی انوراگ ٹھاکر، اپراجِتا سارنگی اور سامک بھٹا چاریہ کو وفد کا حصہ بناسکتی ہے۔ 
اسد الدین اویسی کی شمولیت یقینی
  پہلگام حملے کے بعد پاکستان کو منہ توڑ جواب دینےوالوں میں ایم آئی ایم کے اسد الدین اویسی سر فہرست  ہیں۔  ذرائع کے مطابق علاقائی پارٹیوں  کے جن لیڈروں کو وفد کا حصہ بنایا جائےگا ان میں اویسی کا نام سب سے اوپرہے۔