ہندوستان کے شوبھانشو شکلا ایکسوم اسپیس کے چوتھے کمرشل مشن کے حصے کے طور پر اپنی پہلی خلائی پرواز کے لیے تیار ہیں، جو انٹرنیشنل اسپیس اسٹیشن (آئی ایس ایس) کے لیے۸؍ جون کو فلوریڈا کے کینیڈی اسپیس سینٹر سے اسپیس ایکس کے فالکن ۹؍ راکٹ کے ذریعے روانہ ہوگا۔

ہندوستان کے شوبھانشو شکلا ایکسوم اسپیس کے چوتھے کمرشل مشن کے حصے کے طور پر اپنی پہلی خلائی پرواز کے لیے تیار ہیں، جو انٹرنیشنل اسپیس اسٹیشن (آئی ایس ایس) کے لیے۸؍ جون کو فلوریڈا کے کینیڈی اسپیس سینٹر سے اسپیس ایکس کے فالکن ۹؍ راکٹ کے ذریعے روانہ ہوگا۔امریکی تجربہ کار خلاباز پیگی وٹسن ایکسوم۴؍ مشن کی کمانڈر ہوں گی۔ شکلا، جنہیں عرفیت سے `شکس کہا جاتا ہے، نے جنوری میں ایک پریس کانفرنس میں کہا تھا، ’’میں مائیکرو گریویٹی میں جانے اور خود خلائی پرواز کا تجربہ کرنے کے لیے بہت متجسس ہوں۔‘‘
ایک بارخلا میں  جانے کے بعد، خلاباز مدار میں موجود لیبارٹری میں۱۴؍ دن تک قیام کریں گے، جہاں وہ سائنسی، رابطہ کاری اور کمرشل سرگرمیاں انجام دیں گے۔ایکس۴؍ خلاباز اپنے۱۴؍ روزہ قیام کے دوران۳۱؍ ممالک کی نمائندگی کرتے ہوئے تقریباً۶۰؍ سائنسی مطالعہ اور سرگرمیاں انجام دیں گے۔  
شکلا ہندوستانی خلائی تحقیقاتی تنظیم (اسرو) اور ڈیپارٹمنٹ آف بائیو ٹیکنالوجی (ڈی بی ٹی) کے اشتراک سے تیار کردہ خصوصی خوراک اور غذائیت سے متعلق تجربات کریں گے، جنہیں ناسا کی حمایت حاصل ہے۔ یہ تجربات مستقبل کے طویل مدتی خلائی سفر کے لیے خلائی غذائیت اور خود کفیل لائف سپورٹ سسٹمز کی راہ ہموار کرنے کیلئے  ہیں۔اسرو نے شکلا کیلئے  سات تجربات کا ایک سلسلہ ترتیب دیا ہے، وہ ناسا کے انسانی تحقیقاتی پروگرام کیلئے  منصوبہ بند پانچ مشترکہ مطالعوں میں بھی حصہ لیں گے۔
شکلا  نے آئی ایس ایس پر تجربات کیلئے ہندوستان سے متعلق خوراک پر توجہ دینے کے منصوبے بنائے ہیں، جن میں مائیکرو گریویٹی حالات میں میتھی (فینوگریک) اور مونگ (ہری گرام) اگانا شامل ہے۔  
شکلا بیجوں کو مائیکروبیوٹک حالات میں بھی لے جائیں گے اور انہیں واپس زمین پر لائیں گے جہاں انہیں نہ صرف ایک بار بلکہ نسلوں تک پودوں میں کاشت کیا جائے گا۔  
جنوری میں، شکلا نے کہا کہ وہ آئی ایس ایس پر اپنے تجربات کو تصاویر اور ویڈیوز کے ذریعے ریکارڈ کرنے کا ارادہ رکھتے ہیں جو وطن واپسی پر ہندوستانیوں کے ساتھ شیئر کیے جا سکتے ہیں۔ انہوں نے کہا، ’’میں چاہتا ہوں کہ وہ میری آنکھوں سے اس سنسنی خیز تجربے کو شیئر کریں، کیونکہ میں سچے دل سے مانتا ہوں کہ ایک فرد کے طور پر خلا میں سفر کرنے کے باوجود یہ ۱۴۰؍ کروڑ لوگوں کا سفر ہے۔‘‘
شکلا نےمزید کہا کہ وہ۱۴؍ روزہ مشن کے دوران ملک کے مختلف حصوں سے کچھ اشیاء اپنے ساتھ آئی ایس ایس لے جانے کا ارادہ رکھتے ہیں اور ساتھ ہی  مدار میں موجود لیبارٹری میں خلابازوں کو ہندوستانی کھانا پیش کرنے کی امید ظاہر کی۔  
انہوں نے کہا کہ ایکسوم مشن۴؍ کا تجربہ۲۰۲۷ء کیلئے منصوبہ بند گگن یان مشن میں بہتر طور پر استعمال کیا جائے گا۔واضح رہے کہ اسرو ایکسوم۴؍ مشن پر۵۵۰؍ کروڑ روپے خرچ کر رہا ہے۔