ہندوستانی خواتین فٹ بال ٹیم کو جمعرات کی رات کولکاتا کے کشور بھارتی کریڑانگن میں کھیلے گئے دوستانہ مقابلے میں روس کے ہاتھوں ۰۔۴؍گول سے شکست کا سامنا کرنا پڑا۔

ہندوستانی خواتین فٹ بال ٹیم کو جمعرات کی رات کولکاتا کے کشور بھارتی کریڑانگن میں کھیلے گئے دوستانہ مقابلے میں روس کے ہاتھوں ۰۔۴؍گول  سے شکست کا سامنا کرنا پڑا۔ عالمی درجہ بندی میں ۶۹؍ویں مقام پر موجود ہندوستانی ٹیم نے ۲۷؍ویں نمبر کی مضبوط روسی ٹیم کو پہلے ہاف میں کافی دیر تک گول کرنے سے روکے رکھا، لیکن وقفے کے بعد روس نے جارحانہ کھیل کا مظاہرہ کرتے ہوئے یکے بعد دیگرے چار گول داغ دیے۔ روس کی یانا شینا نے ۴۰؍ویں منٹ میں پہلا گول کرکے اپنی ٹیم کو برتری دلائی، جبکہ متبادل کھلاڑی کیرا پیٹوخووا نے ۶۰؍ویں اور ۶۵؍ویں منٹ میں دو گول کرکے ہندوستان کی مشکلات بڑھا دیں۔ 

یہ بھی پڑھئے:ہندوستان: اسٹارلنک کی منظوری میں تاخیر پر مسک کا سوال: کیا امبانی اصل سربراہ ہیں؟

یانا سویستونوا نے ۸۱؍ویں منٹ میں چوتھا گول کرکے روس کی کامیابی یقینی بنادی۔ بھارتی ٹیم کے ہیڈ کوچ کرسپن چھیتری نے اس مقابلے کے ذریعے کئی نوجوان کھلاڑیوں کو بین الاقوامی سطح پر اپنی صلاحیتیں دکھانے کا موقع دیا۔ بیبیسانا دیوی تھنگبجَم، مالتی منڈا، سنڈی کولنی، شبھانگی سنگھ، درگا پیرومل اور سِبانی دیوی نونگمیکاپم نے اپنے بین الاقوامی کریئر کا آغاز کیا، جبکہ گول کیپر مونالیشا دیوی موئیرانگتھیم نے اپنا تیسرا بین الاقوامی میچ کھیلا۔ 
کولکاتا میں ہندوستانی خواتین فٹ بال ٹیم کا یہ پہلا بین الاقوامی مقابلہ تھا۔ عالمی درجہ بندی میں بڑے فرق کے باوجود ہندوستانی کھلاڑیوں نے ابتدائی مرحلے میں منظم دفاعی کھیل پیش کیا اور روسی حملوں کو روکنے کی بھرپور کوشش کی۔ مونالیشا نے بھی کئی اہم بچاؤ کرکے مخالف ٹیم کو برتری حاصل کرنے سے روکے رکھا۔ میچ کے تقریباً ۳۰؍ویں منٹ میں مالویکا پی کے پاس گول کرنے کا اچھا موقع آیا، لیکن روسی گول کیپر نتالیہ سیلینا نے بروقت آگے بڑھ کر حملہ ناکام بنادیا۔ پہلے ہاف کے اختتام سے قبل لنڈا کوم سرتو کو بھی موقع ملا، تاہم ہندوستانی ٹیم اسے گول میں تبدیل نہیں کرسکی۔ بالآخر ۴۰؍ویں منٹ میں یانا شینا نے نچلے کونے میں درست نشانہ لگاکر روس کو ۰۔۱؍گول کی برتری دلادی۔

یہ بھی پڑھئے:’’ایونجرز: ڈومز ڈے‘‘ نے پیشگی ٹکٹ فروخت میں ۱۰۰؍ ملین ڈالر کا ہندسہ عبور کرلیا

دوسرے ہاف میں تیز بارش اور میدان کی گیلی سطح نے کھیل کو مزید مشکل بنادیا۔ روسی ٹیم نے دباؤ بڑھایا اور  ۶۰؍ویں منٹ میں کیرا پیٹوخووا نے گول کرکے برتری دگنی کردی۔ پانچ منٹ بعد پیٹوخووا نے ایک اور گول کرکے اپنی ٹیم کو ۰۔۳؍گول  سے آگے کردیا۔ اس کے بعد ہندوستانی کوچ نے تین تبدیلیاں کرتے ہوئے شبھانگی سنگھ، پریہ درشنی سیلادورئی اور رینو کو میدان میں اتارا، لیکن روسی حملوں کی شدت کم نہ ہوسکی۔ ۸۱؍ویں منٹ میں یانا سویستونوا نے چوتھا گول کرکے مقابلے کا فیصلہ کردیا۔ اس شکست کے باوجود پہلے ہاف میں ہندوستانی ٹیم کی دفاعی کارکردگی اور نوجوان کھلاڑیوں کو بین الاقوامی تجربہ فراہم کرنے کی کوشش اہم رہی۔ اب بھارت اور روس کی خواتین فٹ بال ٹیمیں ۱۱؍ اکتوبر کو دوسرے دوستانہ مقابلے میں آمنے سامنے ہوں گی، جہاں ہندوستانی ٹیم بہتر کھیل کا مظاہرہ کرتے ہوئے گزشتہ شکست کا ازالہ کرنے کی کوشش کرے گی۔