انڈونیشیا  کے  ایک غیر آباد جزیرہ کو طبی مرکز میں تبدیل کرکے وہاں غزہ کے زخمی شہریو ںکا علاج کیاجائے گا۔

انڈونیشیا  کے  ایک غیر آباد جزیرہ کو طبی مرکز میں تبدیل کرکے وہاں غزہ کے زخمی شہریو ںکا علاج کیاجائے گا۔ وہاں کی حکومت کے  کے بقول ہم اپنے غیر آباد جزیرے گالانگ کو طبّی مرکز میں تبدیل کر کے غزہ کے زخمیوں کا علاج کریں گے۔ انڈونیشیا صدارتی دفتر کے ترجمان حسن نصبی نے جمعرات کو جاری کردہ بیان میں کہا ہے کہ انڈونیشیا  اپنے غیر آباد جزیرے گالانگ کو ایک طبی مرکز میں تبدیل کر کے غزہ  کے تقریباً ۲؍ ہزارزخمیوں کا علاج کرے گا اور  یہ زخمی  صحت یاب ہونے کے بعد اپنے گھروں کو واپس لوٹ جائیں گے۔ نصبی نے صحافیوں کو بتایا ’’انڈونیشیا  نے غزہ کے لئے انسانی امداد بھیجی ہے اور  ہم غزہ  جنگ کے متاثرین، زخمیوں اور ملبے تلے دبے تقریباً ۲؍ہزارفلسطینیوں کو طبی امداد فراہم کریں گے ۔ انہو ں نے مزیدکہا کہ  جزیرہ سماترا کے قریب اور سنگاپور کے جنوب میں واقع جزیرہ `گالانگ اس وقت غیر آباد ہے اور ہم اسے  غزہ کے زخمیوں کے علاج کے لئے اسپتال  اور مریضوں کے تیمار داروں کے لئے  عارضی پناہ  گاہ میں تبدیل کرنا چاہتے ہیں۔
 حسن نے اس  منصوبے کی تکمیل کے وقت  سے متعلق  مزید تفصیلات فراہم نہیں کیں ۔ انہوں نے صحافیوں کے سوالات کو انڈونیشیا کی وزارت خارجہ اور وزارت دفاع کی طرف موڑ دیا ۔ تاہم دونوں وزارتوں  نے فوری  تبصرے  کی درخواستوں کا جواب نہیں دیا۔
 انڈونیشیا کے صدر `پرابوؤ  سوبیانتو کی جانب سے زخمی فلسطینیوں کو پناہ دینے کی پیشکش کے  امریکہ کے صدر ڈونالڈ ٹرمپ کی فلسطینیوں کے غزہ  سے مستقل انخلاء کی تجویز سے مشابہ ہونے کی وجہ سے یہ منصوبہ انڈونیشیا کے علماء کی  تنقیدوں کا نشانہ بن رہا ہے۔
 ٹرمپ کی تجویز کے جواب میں اسرائیل فلسطین تنازع میں دو ریاستی حل کی حامی انڈونیشیا  وزارت خارجہ `نے کہا تھا کہ وہ فلسطینیوں کو زبردستی بے دخل کرنے کی کسی بھی کوشش کو سختی سے مسترد کرتی  ہے ۔ واضح رہے کہ جزیرہ گالانگ میں ۲۰۲۰ء میں کووڈ ۱۹؍  کے مریضوں کے علاج کیلئے اسپتال کھولا گیا تھا۔ اس  سے پہلے ۱۹۹۶ء تک یہاں  اقوام متحدہ کے زیر انتظام ایک وسیع پناہ گزیں کیمپ تھا جس میں ویتنام  جنگ  سے فرار ہونے  والے ۲؍ لاکھ ۵۰؍ ہزار افراد کو پناہ دی گئی تھی۔