جنوبی ہند کے سپر اسٹار رجنی کانت کی ایکشن فلم ’’جیلر ۲‘‘ نے ریلیز کے ابتدائی پانچ دنوں میں شاندار کاروبار کرتے ہوئے باکس آفس پر بڑی کامیابی حاصل کرلی ہے۔ نیلسن دلیپ کمار کی ہدایت کاری میں بننے والی اس فلم نے دنیا بھر میں تقریباً۷۵ء۴۷۷؍ کروڑ روپے کی مجموعی کمائی کرلی ہے ۔

 جنوبی ہند کے سپر اسٹار رجنی کانت کی ایکشن فلم ’’جیلر ۲‘‘ نے ریلیز کے ابتدائی پانچ دنوں میں شاندار کاروبار کرتے ہوئے باکس آفس پر بڑی کامیابی حاصل کرلی ہے۔ نیلسن دلیپ کمار کی ہدایت کاری میں بننے والی اس فلم نے دنیا بھر میں تقریباً۷۵ء۴۷۷؍ کروڑ روپے کی مجموعی کمائی کرلی ہے اور اب ۵۰۰؍ کروڑ روپے کے اہم سنگ میل سے کچھ ہی فاصلے پر ہے۔ اس کامیابی کے ساتھ فلم ۲۰۲۶ء کی دنیا بھر میں سب سے زیادہ کمائی کرنے والی ہندوستانیفلموں میں تیسرے مقام پر پہنچ گئی ہے۔ 

یہ بھی پڑھئے:یوم آئین پر سماجوادی پارٹی کا انتخابی منشور جاری کرنے کا اعلان

’’جیلر ۲‘‘ نے پیر کے روز تقریباً۵۰ء۴۹؍ کروڑ روپے کی مجموعی گھریلو کمائی کی، جو کسی تمل فلم کے پہلے پیر کا اب تک کا سب سے بڑا کاروبار بتایا جا رہا ہے۔ فلم نے اس معاملے میں وجے کی فلم ’’لیو‘‘ کو پیچھے چھوڑ دیا، جس نے اپنے پہلے پیر کو تقریباً۵۰ء۳۹؍ کروڑ روپے کمائے تھے۔ فلم کی اس کامیابی میں نوراتری کی تعطیلات اور سنیما گھروں میں شائقین کی بڑی تعداد میں آمد نے اہم کردار ادا کیا۔ 
تجارتی ویب سائٹ ساکنلک کے اعداد و شمار کے مطابق، ریلیز کے پانچ دنوں میں فلم کی  ہندوستان  میں خالص کمائی تقریباً۲۵ء۲۴۲؍ کروڑ روپے اور مجموعی کمائی۷۵ء۲۸۳؍کروڑ روپے رہی۔ بیرون ملک کمائی تقریباً ۱۹۴؍ کروڑ روپے تک پہنچ گئی، جس کے بعد دنیا بھر میں اس کا مجموعی کاروبار۷۵ء۴۷۷؍  کروڑ روپے ہوگیا۔ یہ اعداد و شمار ابتدائی تجارتی تخمینوں پر مبنی ہیں اور مختلف ذرائع کے حساب میں فرق ہوسکتا ہے۔ 
 ’’جیلر ۲‘‘ نے اپنی شاندار کمائی کے ساتھ ’’بارڈر۲‘‘ اور ’’ہنومان انش‘‘ جیسی فلموں کے مجموعی کاروبار کو پیچھے چھوڑ دیا ہے۔ دستیاب رپورٹ کے مطابق۲۰۲۶ء میں اس سے آگے صرف ’’دُھرندھر: دی ریوینج‘‘ اور ’’دریشیم ۳‘‘ ہیں۔ فلم کی موجودہ رفتار برقرار رہنے کی صورت میں اس کے مزید ریکارڈ قائم کرنے کے امکانات ہیں۔  

یہ بھی پڑھئے:ٹائیگر شروف فائرنگ: ہندی فلم انڈسٹری میں قانون و انتظام کی صورتِ حال پر تشویش

نیلسن دلیپ کمار کی ہدایت کاری اور سن پکچرز کی پیشکش ’’جیلر ۲‘‘ میں رجنی کانت ایک مرتبہ پھر ٹائیگر متھوویل پانڈین کے کردار میں نظر آ رہے ہیں۔ فلم کی کہانی میں انہیں جرائم کی دنیا سے جڑے نئے خطرات کا سامنا کرنا پڑتا ہے۔ فلم کی نمایاں کاسٹ میں ودیا بالن، ایس جے سوریہ، رامیا کرشنن، متھن چکرورتی اور سورج وینجاراموڈو شامل ہیں۔ اس کے علاوہ موہن لال، رتیک  روشن، شیوا راج کمار اور جیکی شروف خصوصی کرداروں میں دکھائی دیتے ہیں۔ انیرودھ روی چندر نے فلم کی موسیقی ترتیب دی ہے۔ 
 رجنی کانت کے مداحوں میں فلم کے لیے زبردست جوش و خروش دیکھا جا رہا ہے۔ ہندوستان کے ساتھ امریکہ اور جنوب مشرقی ایشیا کی منڈیوں میں بھی فلم کو اچھا ردعمل ملا ہے۔ اب سب کی نظریں اس بات پر ہیں کہ ’’جیلر ۲‘‘ کتنی جلدی ۵۰۰؍ کروڑ روپے کا عالمی کاروبار مکمل کرتی ہے اور کیا یہ اپنی کامیابی کے سلسلے کو برقرار رکھتے ہوئے سال کی سب سے زیادہ کمائی کرنے والی فلموں کی فہرست میں مزید اوپر پہنچ پاتی ہے۔ مجموعی طور پر’ ’جیلر ۲‘‘ کی ابتدائی کامیابی نے رجنی کانت کی مقبولیت اور تمل سنیما کی تجارتی قوت کو ایک مرتبہ پھر نمایاں کردیا ہے۔ فلم کا  ۵۰۰؍کروڑ روپے کے قریب پہنچنا نہ صرف اداکار کے مداحوں بلکہ ہندوستانی فلمی صنعت کے لیے بھی ایک اہم پیش رفت ہے۔