بی جےپی کے سینئر لیڈر اور مرکزی وزیر پرکاش جاوڈیکر نے الزام عائد کیاکہ کانگریس لیڈر راہل گاندھی کے من میں آئینی تنظیموں کے تئیں کوئی احترام نہیں ہے اور یہی وجہ ہے کہ انہوں نے بدھ کو دفاعی معاملوں کی پارلیمانی کمیٹی کی میٹنگ کا بائیکاٹ کیا۔

بی جےپی کے سینئر لیڈر اور مرکزی وزیر پرکاش جاوڈیکر نے الزام عائد کیاکہ کانگریس لیڈر راہل گاندھی کے من میں آئینی تنظیموں کے تئیں کوئی احترام نہیں ہے اور یہی  وجہ ہے کہ انہوں نے بدھ کو دفاعی معاملوں کی پارلیمانی کمیٹی کی میٹنگ کا بائیکاٹ کیا۔پرکاش جاوڈیکر نے الزام لگایا کہ راہل گاندھی کو اس بات کا علم نہیں ہے کہ کمیٹی کے سامنے سال بھر میں کون کون سے موضوع رکھے جائیں گےجبکہ یہ موضوع میٹنگ میں ذکر کے بعد ہی طے ہوتے ہیں۔ انہوں نے کہا کہ پچھلے ڈیڑھ سال میں کمیٹی کی۱۴؍ میٹنگیں ہوئیں جن میں سے وہ صرف دو میٹنگوں میں  موجود رہے۔انہوں نے کہا کہ’’جب موضوع پر مشورے کا موقع تھا  تب راہل گاندھی اور ان کے ساتھیوں نے کچھ نہیں کہا اور اب بی جےپی پر یہ کہہ کر قصور تھوپ رہے ہیں کہ میٹنگ میں اہم موضوع نہیں اٹھائے جارہے ہیں۔‘‘ انہوں نے کہا کہ مستقل کمیٹی کی میٹنگ  میں اختلاف ظاہر کرنا ا ور عوام  کے درمیان تقریر کرنا الگ الگ کام ہے۔
 پرکاش جاوڈیکر نے کہا کہ وزیراعظم منموہن سنگھ جی کی حکومت کے دوران بھی راہل گاندھی نے کابینہ سے منظور آرڈنینس کو عوامی سطح پر ایک پریس کانفرنس میں پھاڑ دیا تھا جس سے ثابت ہوتا ہے کہ آئین کے تئیں انہیں کوئی عقیدت نہیں ہے۔ انہوں نے مستقل کمیٹی کا بائیکاٹ کرکے ایک بار پھر آئینی اداروں کی توہین کی ہے۔واضح رہے کہ کانگریس کے سابق صدر اور رکن پارلیمنٹ راہل گاندھی اور کچھ دیگر اراکین نے بدھ کو دفاعی معاملے کی پارلیمانی کمیٹی کی میٹنگ کا بائیکاٹ کرتے ہوئے الزام لگایا تھا کہ قومی سلامتی  کے اہم مسئلوں کے بجائے مسلح افواج کی وردی پر بحث کرکے وقت برباد کیا جارہا ہے۔ وہ دراصل میٹنگ میں قومی سلامتی کے امور اور لداخ میں تعینات سلامی دستوں کو مضبوط بنانے جیسےمسائل  اٹھانا چاہتے تھے۔