ٹی ایم سی کو غنڈوں کی پارٹی قرار دیا، کہا اس کا وہی حال ہوگا جو سی پی ایم کا ہوا، مغربی بنگال میں بی جےپی کومتبادل قراردیا۔
EPAPER
Updated: March 06, 2024, 10:14 AM IST | Agency | Kolkata
ٹی ایم سی کو غنڈوں کی پارٹی قرار دیا، کہا اس کا وہی حال ہوگا جو سی پی ایم کا ہوا، مغربی بنگال میں بی جےپی کومتبادل قراردیا۔
مغربی بنگال میں اساتذہ کی بھرتی کے کیس اور دیگر کئی مقدمات میں ممتا بنرجی سرکار کے خلاف فیصلہ سنانے اور ان کے وزیر تک کو جیل میں بھیجنے کا حکم سنانے والے کلکتہ ہائی کورٹ کے جسٹس ابھیجیت گنگو پادھیائے منگل کی دوپہر جج کے عہدہ سے استعفیٰ دیدیا اور ساتھ قیاس آرائیوں کو سچ ثابت کرتے ہوئے بی جےپی میں شمولیت کا اعلان کردیا۔ اس کے ساتھ ہی ٹی ایم سی سرکار کے خلاف ابھیجیت گنگوپادھیائے کے سنائے گئے تمام فیصلوں پر سوالیہ نشان لگ گیا ہے۔ انہوں نے اپنے استعفیٰ اور بی جےپی میں شمولیت کے اعلان کے ساتھ ہی ترنمول کانگریس کو نشانہ بنایا اور پیش گوئی کہ’’اس الیکشن میں ترنمول کانگریس کا وہی حال ہوگا جو سی پی آئی ایم کا ہے۔‘‘ انہوں نے دعویٰ کیا کہ ’’اگلے الیکشن میں پوری پارٹی ختم ہوجائے گی۔ انہوں نے کہا کہ وہ ترنمول کانگریس کو سیاسی پارٹی تسلیم نہیں کرتے بلکہ یہ غنڈوں اور بدعنوان افراد کی پارٹی ہے۔‘‘
بی جے پی میں شمولیت کا اعلان کرتے ہوئے انہوں نے کہا کہ وہ سی پی آئی ایم میں شامل نہیں ہوسکتے کیوں کہ وہ بھگوان میں یقین رکھتے اور کانگریس زمینداروں کی اور خاندانی پارٹی ہے۔ انہوں نے کہا کہ بی جے پی ہی ترنمول کانگریس کا بہترین متبادل ہے۔ انہوں نے کہا کہ۷؍ مارچ کو وہ بی جے پی میں باضابطہ شامل ہوجائیں گے۔