میاں بیوی اے آئی کی مدد سے اے سی لوکل ٹرین کا پاس بناتے تھے

جدیدٹیکنالوجی کے دور میں جہاں آرٹی فیشل انٹیلی جنس ( اے آئی) زندگی کو آسان بنانے کا ذریعہ بن رہا ہے وہیں اس کے غلط استعمال کے واقعات بھی تیزی سے سامنے آ رہے ہیں۔ ایسا ہی ایک چونکا دینے والا واقعہ امبرناتھ کے ایک اعلیٰ تعلیم یافتہ اور معاشی طور پر خوشحال جوڑے نے انجام دیا جنہوں نے اے آئی کی مدد سے لوکل ٹرین کا جعلی (اے سی) پاس تیار کیا۔ چند سو روپے بچانے کی اس کوشش نے نہ صرف ان کی عزت داؤ پر لگا دی ہے بلکہ اب وہ دھوکہ دہی کے سنگین الزام میں جیل کی سلاخوں کے پیچھے پہنچ گئے ہیں۔
 گورنمنٹ ریلوے پولیس( جی آر پی)  کے مطابق یہ معاملہ کلیان ریلوے اسٹیشن پر اس وقت سامنے آیا جب ایک  اے سی لوکل ٹرین میں معمول کی ٹکٹ چیکنگ کے دوران ٹکٹ چیکر وشال نولے نے ایک خاتون سے ٹرین کا پاس دکھانے کو کہا۔ خاتون نے اعتماد کے ساتھ ریلوے کے آفیشل یو ٹی ایس ایپ پر اپنا اےسی  پاس دکھایا مگر ٹکٹ چیکر کو پاس کی تفصیلات دیکھ کر شبہ پیدا ہوا۔ شک کی بنیاد پر انہوں نے فوراً ریلوے ہیلپ  لائن سے رابطہ کرکے پاس کی تصدیق کرائی۔ ریلوے حکام کی جانب سےکی گئی توثیق میں متعدد بے ضابطگیاں سامنے آئیں۔یہ پاس اوم شرما نام کے شخص کے نام پر جاری ہوا تھا، خاتون کےنام پر نہیں۔پاس رواں سال جنوری میں جاری ہوا اور فروری میں ہی اس کی میعاد ختم ہو چکی تھی۔
 خاتون نےاپنا نام گڑیا شرما بتایا مگر پاس پر موجود تفصیلات سے کوئی میل نہیں تھا۔ شک مزید گہرا ہونے پر خاتون کو ڈومبیولی اسٹیشن پر اتار کر ریلوے پروٹیکشن فورس(آر پی ایف) کے دفتر لےجایا گیا جہاں پوچھ گچھ کی گئی۔تفتیش کے دوران ایک اور حیران کن پہلو سامنے آیا۔ خاتون نے اعتراف کیا کہ یہ پاس اس کے شوہر نے اے آئی ٹولز کی مدد سے ایڈٹ کرکے تیار کیا تھا۔ شوہر نے اپنا اصلی اے سی لوکل پاس ڈیجیٹل طور پر ترمیم کر کے اس میں اپنی بیوی کا نام، تصویر اور دیگر تفصیلات شامل کیں۔ مقصد صرف یہ تھا کہ بیوی بغیر اصل پاس خریدے اے سی لوکل میں سفر کر سکے۔
 مزید حیرت انگیز بات یہ ہےکہ امبرناتھ میں رہائش پذیر یہ جوڑا سماجی اورپیشہ ورانہ طور پر ایک معزز حیثیت رکھتا ہے۔شوہر ایک ملٹی نیشنل فائنانس کمپنی میں اعلیٰ عہدے پر فائز ہے جبکہ بیوی ایک معروف بینک میں منیجر کے طور پر خدمات انجام دے رہی ہے۔اس معاملےمیں جی آر پی نے جوڑے کے خلاف فریب دہی اور جعلی دستاویزات کی دفعات کے تحت مقدمہ درج کر کے انہیں گرفتارکر لیا ہے۔