• Sun, 22 November, 2026
  • EPAPER

Inquilab Logo Happiest Places to Work

انڈیا مارٹ پر اینٹی ڈرون گن کی فہرست سازی مہنگی پڑگئی

Updated: November 22, 2026, 9:30 PM IST | New Delhi

بغیر ضروری سرکاری منظوری اور قانونی وضاحت کے اینٹی ڈرون گن کی تشہیر کا معاملہ۔ کمپنی کا اسے غیر فعال نمونہ قرار دینے کا دعویٰ مسترد۔ آئندہ اشتہارات میں گمراہ کن معلومات سے گریز اور ۱۵ دن میں تعمیلی رپورٹ جمع کرانے کی ہدایت۔

Indiamart.Photo:INN
انڈیا مارٹ۔ تصویر:آئی این این

مرکزی صارفین تحفظ اتھارٹی (سی سی پی اے) نے آن لائن کاروباری پلیٹ فارم انڈیا مارٹ پر اینٹی ڈرون گن کی فہرست سازی اور تشہیر کے معاملے میں سخت کارروائی کرتے ہوئے ایئر وَن روبوٹکس پر ۱۰؍ لاکھ روپے کا جرمانہ عائد کردیا ہے۔ اتھارٹی کے مطابق کمپنی نے ’’اینٹی ڈرون گن وی ایس کے پی ۰۳-پی آر او‘‘ نامی آلے کو ضروری قانونی منظوریوں اور لازمی وضاحتوں کے بغیر فروخت کے لیے پیش کیا تھا، جس سے صارفین کو مصنوعات کی اصل نوعیت، صلاحیت اور قانونی حیثیت کے بارے میں گمراہ کن تاثر مل سکتا تھا۔ سی سی پی اے نے ۱۹؍ نومبر ۲۰۲۶ء کو جاری اپنے حکم میں اسے صارفین کے حقوق کی خلاف ورزی، گمراہ کن اشتہار اور غیر منصفانہ کاروباری عمل قرار دیا۔سی سی پی اے کے حکم کے مطابق، انڈیا مارٹ پر مذکورہ اینٹی ڈرون گن کی قیمت ۸ ؍لاکھ ۳۰ ؍ہزار روپے فی عدد درج تھی۔ اس کے ساتھ ’’ان اسٹاک‘‘ کا نشان، مصنوعات کی تصاویر، ویڈیو اور تکنیکی تفصیلات بھی موجود تھیں۔ فہرست میں اسے ایک جدید ہینڈ ہیلڈ الیکٹرانک وارفیئر ڈیوائس بتایا گیا تھا، جو غیر مجاز یا دشمن ڈرون کو درست نشانے کے ساتھ ناکارہ بنانے کی صلاحیت رکھتی ہے۔ اس کی تشہیر میں فوج، قانون نافذ کرنے والے اداروں اور اہم بنیادی ڈھانچے کے تحفظ کے لیے موزوں ہونے کا دعویٰ بھی کیا گیا تھا۔اتھارٹی نے کہا کہ قیمت، دستیابی، تفصیلی خصوصیات اور خریدار سے رابطے کے لیے دیے گئے اختیارات سے یہ واضح ہوتا تھا کہ مصنوعات کو محض نمونے کے طور پر نہیں بلکہ ایک قابلِ خرید آلے کے طور پر پیش کیا جارہا تھا۔ فہرست میں سپلائر کو ’’ویری فائیڈ پلس سپلائر‘‘ بھی ظاہر کیا گیا تھا، جب کہ اس کے پروفائل پر ۴ء۲؍ کی درجہ بندی، ۱۹؍ جائزوں اور ۸۷؍ فیصد جوابی شرح کا ذکر تھا۔ سی سی پی اے کے مطابق ان تمام معلومات نے ممکنہ خریداروں کے اعتماد کو متاثر کرنے والا تاثر پیدا کیا۔

یہ بھی پڑھئے:’دھرندھر‘ کے بعد رنویر سنگھ اور آدتیہ دھر پھر ساتھ آئیں گے، ۲۰۲۸ء میں نئی فلم متوقع

ایئر وَن روبوٹکس کے مالک ایمروز سردار نے اتھارٹی کے سامنے موقف اختیار کیا کہ متعلقہ مصنوعات دراصل ایک غیر فعال ماڈل یا نقل تھی، جس کا مقصد نمائش، تعلیمی سرگرمیوں یا کلیکٹرز کے لیے استعمال تھا۔ ان کے مطابق اس میں ایسا کوئی سرکٹ، ٹرانسمیٹر یا نظام موجود نہیں تھا جو جی پی ایس، موبائل نیٹ ورک یا ریڈیو فریکوئنسی سگنلز کو متاثر کرسکے۔ کمپنی نے یہ بھی دعویٰ کیا کہ اس نے کبھی کوئی فعال اینٹی ڈرون گن یا سگنل جیمر تیار، درآمد یا فروخت نہیں کیا۔کمپنی کے مالک نے یہ وضاحت بھی دی کہ مصنوعات کی فہرست تیار کرنے کے لیے ایک طالب علم فری لانسر کی خدمات حاصل کی گئی تھیں، جس نے انٹرنیٹ سے تصاویر اور تفصیلات نقل کرکے کیٹلاگ میں شامل کردیں۔ ان کے مطابق ’’ان اسٹاک‘‘ کا نشان بھی انڈیا مارٹ کے نظام میں خودکار طور پر ظاہر ہوا تھا۔ کمپنی نے دعویٰ کیا کہ کسی خریدار کو یہ آلہ فروخت یا فراہم نہیں کیا گیا اور متعلقہ فہرست بعد میں ہٹادی گئی۔تاہم سی سی پی اے نے ان وضاحتوں کو قابلِ قبول نہیں سمجھا۔ اتھارٹی کا کہنا تھا کہ اگر یہ صرف ایک غیر فعال ماڈل تھا تو اس بات کو مصنوعات کی تفصیل میں واضح طور پر درج کیا جانا چاہیے تھا، جب کہ اشتہار میں اسے جدید الیکٹرانک وارفیئر ڈیوائس اور ڈرون کو ناکارہ بنانے والے مؤثر آلے کے طور پر پیش کیا گیا تھا۔ اتھارٹی نے کمپنی کے مختلف بیانات میں تضاد کی بھی نشاندہی کی اور کہا کہ فری لانسر یا آن لائن پلیٹ فارم کی خودکار ترتیبات کو ذمہ داری سے بچنے کا جواز نہیں بنایا جاسکتا۔

یہ بھی پڑھئے:نیوزی لینڈ کے خلاف ہاکی سیریز ہندوستان نے ۰۔۱؍ سے جیتی

سی سی پی اے نے اپنے حکم میں واضح کیا کہ کسی گمراہ کن اشتہار کے خلاف کارروائی کے لیے یہ ثابت کرنا ضروری نہیں کہ کسی صارف نے واقعی مصنوعات خریدی ہو یا اسے مالی نقصان پہنچا ہو۔ اشتہار کی نوعیت اور اس سے صارفین کے گمراہ ہونے کے امکان کو بھی کارروائی کی بنیاد بنایا جاسکتا ہے۔اتھارٹی کے مطابق کمپنی نے مصنوعات کو مقررہ قیمت، دستیابی اور آرڈر دینے کے اختیارات کے ساتھ پیش کیا تھا، اس لیے یہ ایک باقاعدہ تجارتی پیشکش تھی۔ کمپنی کی جانب سے فروخت نہ ہونے کے دعوے کی بھی دستیاب ریکارڈ سے آزادانہ تصدیق نہیں ہوسکی۔ اسی بنیاد پر سی سی پی اے نے کہا کہ حقیقی فروخت کا ثبوت نہ ہونے سے گمراہ کن تشہیر کی ذمہ داری ختم نہیں ہوتی۔
اتھارٹی نے اپنے حکم میں اینٹی ڈرون گن اور سگنل جیمر جیسے آلات کی حساس نوعیت پر بھی روشنی ڈالی۔ ایسے آلات ریڈیو فریکوئنسی اور جی پی ایس سگنلز میں مداخلت کرنے کی صلاحیت رکھتے ہیں۔ ان کا غیر مجاز استعمال شہری ہوا بازی، عوامی تحفظ، مواصلاتی نیٹ ورک اور اہم بنیادی ڈھانچے کے لیے خطرہ بن سکتا ہے۔ہندوستان میں ایسے آلات کی تیاری، درآمد، ملکیت اور استعمال مختلف قوانین اور سرکاری ضوابط کے تحت سخت نگرانی میں آتے ہیں۔ ان میں ٹیلی کمیونیکیشن ایکٹ ۲۰۲۳ء، انڈین وائرلیس ٹیلی گرافی ایکٹ ۱۹۳۳ء، محکمہ ٹیلی کمیونیکیشن (DoT)، وائرلیس پلاننگ اینڈ کوآرڈینیشن (WPC) اور ڈائریکٹوریٹ جنرل آف فارن ٹریڈ (DGFT) سے متعلق ضوابط شامل ہیں۔ وزارت داخلہ اور کابینہ سکریٹریٹ کی متعلقہ ہدایات کے مطابق ایسے آلات کی خریداری اور استعمال کے لیے مجاز سرکاری اداروں کو ضروری اجازتیں حاصل کرنا ہوتی ہیں۔سی سی پی اے کے حکم میں یہ بھی بتایا گیا ہے کہ ٹیلی کمیونیکیشن ایکٹ ۲۰۲۳ء کی دفعہ ۴۲(۳)(اے) کے تحت بغیر اجازت ٹیلی کمیونیکیشن سگنل روکنے والے آلات کی ملکیت یا استعمال پر تین سال تک قید یا ۵۰ لاکھ روپے تک جرمانہ یا دونوں سزائیں ہوسکتی ہیں۔

متعلقہ خبریں

This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK