فرانسیسی صدر ایمانوئل میکرون ایک بار پھر اپنی تقاریر نہیں بلکہ اپنے اندازِ لباس کی وجہ سے توجہ کا مرکز بن گئے ہیں۔ حالیہ ہفتوں میں انہیں متعدد سرکاری تقریبات، حتیٰ کہ عمارتوں کے اندر اور رات کے وقت بھی نیلے ہوا باز طرز کے دھوپ کے چشمے پہنے دیکھا گیا، جس کے بعد سوشل میڈیا پر مختلف قیاس آرائیاں گردش کرنے لگیں۔

فرانسیسی صدر ایمانوئل میکرون ایک مرتبہ پھر غیر معمولی انداز کی وجہ سے خبروں میں ہیں۔ اس بار موضوع ان کے سیاسی بیانات نہیں بلکہ وہ نیلے ہوا باز دھوپ کے چشمے ہیں جو وہ حالیہ دنوں میں مختلف سرکاری تقریبات کے دوران مسلسل پہنے دکھائی دے رہے ہیں۔ میکرون کو حالیہ ہفتوں میں فرانس میں تھائی لینڈ کے بادشاہ مہا وجیرالونگ کورن اور ملکہ سوتھیدا سے ملاقات، سزائے موت کے خلاف نویں عالمی کانگریس سے خطاب اور دمشق کے سرکاری دورے کے دوران بھی انہی چشموں کے ساتھ دیکھا گیا، جہاں انہوں نے شامی صدر احمد الشرع سمیت دیگر حکام سے ملاقات کی۔ خاص بات یہ ہے کہ صدر میکرون کئی مواقع پر عمارتوں کے اندر اور رات کے وقت بھی یہ دھوپ کے چشمے پہنے نظر آئے، جس پر سوشل میڈیا پر سوالات اور قیاس آرائیوں کا سلسلہ شروع ہو گیا۔

یہ بھی پڑھئے: حماس کا غزہ میں اپنی حکومت کے خاتمے کا اعلان

ایکس اور دیگر پلیٹ فارمز پر صارفین نے میکرون کی حالیہ تصاویر اور ویڈیوز شیئر کرتے ہوئے مختلف اندازے لگائے۔ کچھ صارفین نے امکان ظاہر کیا کہ شاید انہیں روشنی سے حساسیت (Light Sensitivity) یا آنکھوں کی کوئی عارضی طبی کیفیت لاحق ہو، جبکہ بعض نے اسے محض ایک فیشن اسٹیٹمنٹ قرار دیا۔ چند صارفین نے مزاحیہ انداز میں لکھا کہ فرانسیسی صدر شاید ٹام کروز کے کرداروں سے متاثر ہو کر ان کا انداز اپنانے کی کوشش کر رہے ہیں۔ سوشل میڈیا پر بعض پوسٹس میں میکرون کی اہلیہ بریژیت میکرون کا بھی ذکر کیا گیا، جہاں کچھ صارفین نے گزشتہ برس ویتنام کے دورے کی ایک وائرل ویڈیو کا حوالہ دیتے ہوئے مختلف غیر مصدقہ دعوے کیے۔ تاہم، یہ دعوے کسی مستند ثبوت پر مبنی نہیں ہیں۔
یاد رہے کہ مئی ۲۰۲۵ء میں ویتنام پہنچنے کے دوران ایک وائرل ویڈیو میں بریژیت میکرون کو صدر کے چہرے کی جانب ہاتھ بڑھاتے دیکھا گیا تھا، جس پر سوشل میڈیا پر مختلف قیاس آرائیاں سامنے آئی تھیں۔ بعد ازاں ایمانوئل میکرون نے ان تمام دعوؤں کو مسترد کرتے ہوئے کہا تھا کہ ویڈیو کو سیاق و سباق سے ہٹ کر پیش کیا گیا اور یہ محض دونوں کے درمیان ایک معمولی مذاق تھا۔ یاد رہے کہ صدر میکرون کو اس سے قبل جنوری ۲۰۲۶ء میں بھی مسلسل دھوپ کا چشمہ پہنے دیکھا گیا تھا۔ بعد میں واضح کیا گیا تھا کہ انہیں Subconjunctival Hemorrhage یعنی آنکھ میں خون کی ایک باریک رگ پھٹنے کا مسئلہ پیش آیا تھا۔

یہ بھی پڑھئے: شہزادہ ہیری کا برطانیہ دورہ: بکنگھم پیلس نے رہائش دینے سے انکار کردیا

طبی ماہرین کے مطابق یہ کیفیت عموماً بے ضرر ہوتی ہے، درد کا باعث نہیں بنتی اور نہ ہی بینائی کو متاثر کرتی ہے۔ اکثر یہ چند ہفتوں کے اندر خود ہی ٹھیک ہو جاتی ہے۔ اس وقت میکرون نے اس صورتحال پر مزاحیہ انداز اپناتے ہوئے اسے ’’Eye of the Tiger‘‘ قرار دیا تھا، جو ۱۹۸۲ء کی فلم Rocky III کے مشہور گانے کی طرف اشارہ تھا۔ انہوں نے کہا تھا کہ جو لوگ اس حوالہ کو سمجھتے ہیں، ان کے لیے یہ عزم اور حوصلے کی علامت ہے۔ تاحال فرانسیسی ایوانِ صدر کی جانب سے اس بارے میں کوئی نئی وضاحت جاری نہیں کی گئی کہ صدر میکرون حالیہ تقریبات میں مسلسل دھوپ کے چشمے کیوں پہن رہے ہیں۔اس لیے سوشل میڈیا پر گردش کرنے والی مختلف قیاس آرائیاں فی الحال محض اندازوں تک محدود ہیں اور ان کی سرکاری طور پر تصدیق نہیں ہوئی۔