مدراس ہائی کورٹ نے قرار دیا ہے کہ ریاست کے زیر انتظام مندروں کے تہوار ذات پات کو فروغ نہیں دے سکتے۔ عدالت نے ہدایت دی کہ آئندہ دعوت ناموں میں ناموں کے ساتھ ذات کے لاحقے شائع نہ کیے جائیں۔

مدراس ہائی کورٹ نے حالیہ سماعت میں مشاہدہ کیا کہ ریاست کے ہندو ریلیجیس اینڈ چیرٹیبل انڈومینٹ ڈپارٹمنٹ کے زیر انتظام مندروں کے تہوار ذات پات کو برقرار رکھنے یا اس کی تشہیر کا ذریعہ نہیں بن سکتے۔ جسٹس بھارت چکرورتی نے زور دیا کہ آئین ہند کا آرٹیکل ۱۴؍ مساوات کی ضمانت دیتا ہے اور جمہوریہ بننے کا مقصد ہی سب کے ساتھ یکساں سلوک کو یقینی بنانا تھا۔ ان کے مطابق ذات پات صرف پیدائش پر مبنی تقسیم ہے، جسے ریاستی اداروں کے ذریعے تقویت نہیں دی جا سکتی۔ عدالت نے کہا کہ اگر کوئی تہوار، جس میں سرکاری محکمہ شامل ہو، اس انداز میں منعقد کیا جائے جس سے ذات پات کو فروغ ملے یا کسی کی ذات پر فخر ظاہر ہو، تو اسے اجازت نہیں دی جا سکتی۔

درخواست اور ریاست کا مؤقف
عدالت این سمرن کی عرضی پر سماعت کر رہی تھی، جس میں مطالبہ کیا گیا تھا کہ مندر کے تہواروں کے دعوت ناموں میں ذات کے ناموں کے استعمال پر پابندی لگائی جائے۔ ریاست نے مؤقف اختیار کیا کہ مندر بذاتِ خود ذات کے نام استعمال نہیں کر رہا، تاہم یہ تسلیم کیا کہ بعض طباعت شدہ دعوت ناموں میں افراد کے نام کے ساتھ ذات کے لاحقے شامل تھے۔ چونکہ موجودہ سال کے دعوت نامے پہلے ہی چھپ چکے تھے، فوری اصلاح ممکن نہیں تھی۔

آئندہ کے لیے ہدایات
عدالت نے حکم دیا کہ مستقبل میں اگر افراد اپنے نام کے ساتھ ذات کے لاحقے استعمال کریں تو انہیں ہٹا دیا جائے اور صرف نام شائع کیے جائیں۔ ریاست کی یہ درخواست بھی مسترد کر دی گئی کہ معاملہ مکمل طور پر مندر کی صوابدید پر چھوڑ دیا جائے۔ تاہم، جلوس کے دوران مورتی کو اٹھانے یا لے جانے سے متعلق تفصیلی قواعد بنانے کی درخواست عدالت نے قبول نہیں کی۔ عدالت کے مطابق ایسی ذمہ داریاں عموماً مقامی سطح پر قابل جسم عقیدت مند انجام دیتے ہیں، اور اس ضمن میں معیاری آپریٹنگ پروسیجر (ایس اوپی) جاری کرنا غیر ضروری پیچیدگیاں پیدا کر سکتا ہے۔