شکایت نہ سننے، توہین کرنے ، زعفرانی پارٹی کی زبان میں بات کرنے اور مغربی بنگال کو نشانہ بنانے پر برہمی کااظہار کیا، ایس آئی آر سے متاثرہ ایسے ۱۲؍ ووٹرس کو اپنے ساتھ لے کر پہنچی تھیں جن میں سے ۵؍ کو مردہ قرار دے کر نام نکال دیاگیا ہے

 مغربی بنگال کی وزیراعلیٰ ممتا بنرجی جو   جلد بازی میں کی جارہی ایس آئی آر کی خامیوں کی شکایت لے کر پیر کو الیکشن کمیشن سے ملاقات کرنے پہنچی تھیں، چیف الیکشن کمشنر گیانیش کمار پر ’’بی جےپی کی زبان میں بات کرنے‘‘ کا الزام عائد کرتے ہوئے میٹنگ ادھوری چھوڑ کر باہر نکل آئیں۔  انہوں نے گیانیش کمار پر میٹنگ کے دوران ان کی ’’توہین اور بے عزتی‘‘ کرنے کا الزام بھی لگایا ۔ 
  وزیراعلیٰ ممتا بنرجی، ٹی ایم سی کے اراکین پارلیمان  اور مغربی بنگال  میں ایس آئی آر سے متاثر ہونے والے ایسے ۱۲؍ افراد کے ساتھ الیکشن کمیشن سے ملنے پہنچی تھیں جن میں سے  ۵؍ کو ایس آئی آر کے دوران مردہ قرار دے کر ان کا نام ووٹر لسٹ سے نکال دیاگیاہے۔الیکشن کمیشن سے ملاقات کیلئے پہنچنے والے اس   وفد نے بطور احتجاج سیاہ شالیں پہن رکھی تھیں۔
  ممتا بنرجی نے الزام لگایا کہ مغربی بنگال کو’’جان بوجھ کر نشانہ‘‘ بنایا جا رہا ہے۔ انہوں نے برہمی کااظہار کیا کہ ریاست کی انتخابی فہرست سے ۵۸؍لاکھ ووٹرس کے نام انہیں اپنی صفائی پیش کرنے کا موقع دیئے بغیر نکال دیئے گئے۔ مغربی بنگال کی وزیراعلیٰ  یہ سوال بھی اٹھایا کہ جب بی جے پی حکومت والی ریاستوں میںایس آئی آر  نہیں ہو رہا ہے تو پھر اپوزیشن کی حکومت والی مغربی بنگال، تمل ناڈو اور کیرالا میں یہ کیوں کیا جا رہا ہے؟ انہوں نے واضح کیا کہ ان کی پارٹی ایس آئی آر کے خلاف نہیں ہے مگر جس طرح  جلد بازی میں  یہ کیا جارہاہے وہ مناسب  نہیں ہے۔ انہوں نے کہا کہ ’’اگرآپ کوایس آئی آر کرنا ہی تھا تو ان ریاستوں کو اس سے باہر رکھتے جہاں الیکشن ہونے ہیں  اور مناسب منصوبہ بندی کے ساتھ یہ پوری کارروائی کرتے۔  آسام میں بی جے پی حکومت ہے، آپ نے  وہاں ایس آئی آر  نہیں کیا، مگر مغربی بنگال اور تمل ناڈو میں کیا۔‘‘
  ایس آئی آر کو’’ الیکشن سے پہلے ہی  حکومت چن لینے‘‘ کی کوشش  قرار دیتے ہوئے انہوں نے کہا کہ اپنے طویل سیاسی کیریئر میں انہوں نے’’کبھی ایسا گھمنڈی اور جھوٹا الیکشن کمشنر نہیں دیکھا۔