برطانوی شہزادے ہیرس کی اہلیہ میگھن مارکل نے کہا ہے کہ شاہی خاندان کے ساتھ وقت گزارنا ناممکنات میں سے تھا۔
EPAPER
Updated: March 09, 2021, 11:55 AM IST | Agency | Washington
برطانوی شہزادے ہیرس کی اہلیہ میگھن مارکل نے کہا ہے کہ شاہی خاندان کے ساتھ وقت گزارنا ناممکنات میں سے تھا۔
برطانوی شہزادے ہیرس کی اہلیہ میگھن مارکل نے کہا ہے کہ شاہی خاندان کے ساتھ وقت گزارنا ناممکنات میں سے تھا۔ محل میں ایک وقت ایسا بھی آیا کہ انہوں نے اپنی زندگی کے خاتمے کا بھی سوچ لیا تھا۔امریکی ٹی وی کی معروف میزبان اوپرا ونفری کو دیئے گئے انٹرویو میں شہزادہ ہیری اور اُن کی اہلیہ میگھن مارکل نے کئی تہلکہ خیز انکشافات کئے ہیں۔
ہیرس نے بتایا کہ وہ شاہی زندگی میں خود کو محصور محسوس کرتے تھے اور اُنہیں حیرت تھی کہ وہ معاشی طور پر تنہا کر دیئے گئے ہیں۔ وہ یہ بھی محسوس کرتے ہیں کہ شاہی خاندان نے اُن کی اہلیہ کو سپورٹ نہیں کیا اور من گھڑت کہانیوں کے ذریعے اُن پر حملے کئے۔ جبکہ میگھن نے بتایا کہ جب وہ پہلی مرتبہ ماں بننے والی تھیں تو محل میں اس بارے میں تشویش پائی جاتی تھی کہ اُن کا بیٹا جب پیدا ہو گا تو اس کی رنگت کس قدر سیاہ ہو سکتی ہے۔ونفری نے انٹرویو کے دوران متعدد بار میگھن کے ذہن میں پلنے والے خیالات کے بارے میں سوال کیا اور ایک موقع پر پوچھا کہ ان کی ذہنی صحت پر اس تمام صورتِ حال کے کیا اثرات ہوئے؟ میگھن نے اس پر جواب دیا کہ انہوں نے اپنے ذہن میں خودکشی کے خیالات پنپتے محسوس کئے اور محل میں ہیومن ریسورس کے شعبے سے اس بارے میں مدد مانگی لیکن اُنہیں بتایا گیا کہ وہ اس بارے میں کچھ نہیں کر سکتے۔
میگھن کے بقول، ’’میں یہ کہتے ہوئے بہت شرمندگی محسوس کر رہی تھی اور ہیری کے سامنے یہ اعتراف کرنے میں بھی شرمسار ہو رہی ہوں کہ میں زندہ نہیں رہنا چاہتی تھی۔‘‘یاد رہے کہ شاہی جوڑے کی شاہی ذمہ داریوں سے سبکدوش ہونے کے بعد منظرِ عام پر آنے والا یہ پہلا انٹرویو ہے جو اس وقت خبروں کی زینت بنا ہوا ہے۔