برقع پوش خواتین کو کالج کے گیٹ پر روکے جانے کے بعد احتجاج رنگ لایا، برقع اُتارنے کیلئے چینجنگ روم بھی فراہم کیاگیا
EPAPER
Updated: January 21, 2023, 3:23 PM IST | Faheem Khan | Moradabad
برقع پوش خواتین کو کالج کے گیٹ پر روکے جانے کے بعد احتجاج رنگ لایا، برقع اُتارنے کیلئے چینجنگ روم بھی فراہم کیاگیا
مراد آباد کے ہندو ڈگری کالج میں برقع پوش طالبات کو کالج کے گیٹ پر ہی روکنے کے معاملے میں احتجاج کے بعد انتظامیہ نے وضاحت کی ہے کہ طالبات کو حجاب پہن کر کلاس میں بیٹھنے کی اجازت ہے۔ اس کے ساتھ ہی برقع پہن کر آنے والی طالبات کیلئے کالج میں چینجنگ روم بھی فراہم کردیا گیا ہے تاکہ وہ کالج پہنچنے کے بعد حجاب پہن کر کلاس میں شریک ہوسکیں۔یاد رہے کہ طالبات کو روکنے کی خبر پاکر سماجوادی پارٹی طلبہ سیل کے عہدیدار اور کارکنان موقع پر پہنچ گئے تھے اور نعرے بازی کرتے ہوئے مطالبہ کیا کہ برقع پوش طالبات کو کلاس تک جانے کی اجازت دی جائے۔
کالج کے پرنسپل ستیہ ویر سنگھ راوت نےوضاحت کی کہ کالج میں برقع پوش طالبات کیلئے چینجنگ روم پہلے سے موجود ہے نیز طالبات یونیفارم پر حجاب پہن کر کلاس میں شریک ہوسکتی ہیں۔ انہوںنے بتایا کہ ۱۵؍اکتوبر سے ڈریس کوڈ کو نفاذ کیاگیا ہے جس کی اطلاع اشتہارات کے ذریعہ بھی دی گئی مگر طلبہ لاپروائی برت رہے تھے اس لئےیکم جنوری سے اسے سختی سے نافذ کیاگیا مگر کچھ لوگوں نے اس کو سیاسی رنگ دےدیا۔