ہند نژاد امریکی مسلم سیاستداں ظہران ممدانی نے نیویارک کے میئر کیلئے ڈیموکریٹک پرائمری الیکشن میں نمایاں کامیابی حاصل کرتے ہوئے اپنے حریف اینڈریو کومو کو شکست دے دی۔

ہند نژاد امریکی مسلم سیاستداں ظہران ممدانی نے نیویارک کے میئر کیلئے ڈیموکریٹک پرائمری انتخابات میں نمایاں کامیابی حاصل کرتے ہوئے اپنے حریف اینڈریو کومو کو شکست دے دی۔ امریکی میڈیا کے مطابق، نیویارک کے میئر شپ کیلئے ڈیموکریٹک پارٹی کے پرائمری انتخابات کا عمل رات۹؍ بجے مکمل ہوا جس میں مجموعی طور پر۱۱؍ لاکھ شہریوں نے اپنا حقِ رائے دہی استعمال کیا۔ انتخابی نتائج کے مطابق، ظہران ممدانی نے ۵ء۴۳؍فیصد ووٹ حاصل کئے جبکہ ان کے مخالف امیدوار اینڈریو کومو کو۴ء۳۶؍ فیصد ووٹ ملے، کامیابی کے بعد ظہران ممدانی نے کہا کہ یہ ان کیلئے ایک اعزاز ہے کہ وہ ڈیموکریٹک پارٹی کی نمائندگی کرتے ہوئے نیویارک کے میئر کے انتخاب میں حصہ لیں گے۔ 

Hope is not naive when you have a vision and a movement behind it. Hope is in fact righteous.

This is the dawn of a new era in New York City. And we will win it together. pic.twitter.com/Hj2buYNN8Z

— Zohran Kwame Mamdani (@ZohranKMamdani) June 25, 2025

اینڈریو کومو نے ابتدائی راؤنڈ کے نتائج کے بعد منگل کی شب اپنی شکست اس وقت تسلیم کرلی جب۹۵؍ فیصد ووٹ گنے جا چکے تھے، انہوں نے مین ہیٹن میں انتخابی اجتماع کے دوران اچانک اسٹیج پر آ کر ظہران ممدانی کو ایک ’ذہین، اچھی اور مؤثر‘ انتخابی مہم پر مبارکباد دی اور ان کے ساتھ فون پر بھی رابطہ کیا۔ اگرچہ اینڈریو کومو اور موجودہ میئر ایرک ایڈمز دونوں نومبر کے عام انتخابات میں آزاد امیدوار کے طور پر میدان میں ہوں گے، تاہم، ظہران ممدانی کی پرائمری میں جیت کو ایک تاریخی سنگِ میل قرار دیا جا رہا ہے۔ 

“Tonight, we made history … I will be your democratic nominee for mayor of New York City” - Zohran Mamdani pic.twitter.com/qTnhuGbi63

— philip lewis (@Phil_Lewis_) June 25, 2025

ظہران ممدانی نے انتخابی دن کا آغاز صبح۵؍ بجکر ۴۰؍ منٹ پرآستوریا پارک میں پریس کانفرنس سے کیا اور پھر جیکسن ہائٹس میں ووٹروں سے ملاقات کی۔ انہوں نے اعلان کیا کہ ہم نیویارک شہر میں ایک نئے دور کے آغاز کے قریب ہیں اور ماضی کی کرپٹ سیاست کا باب بند کر رہے ہیں جس نے اس شہر کو امریکہ کا سب سے مہنگا شہر بنا دیا۔ ان کے حامیوں نے لانگ آئی لینڈ سٹی میں ایک بریوری میں جمع ہو کر کامیابی کا جشن منایا۔ مسلم ڈیموکریٹک کلب آف نیویارک کی صدر ثمن وقار نے اس موقع کو مسلمانوں، جنوبی ایشیائیوں، تارکین وطن اور نیویارک والوں کیلئے تاریخی قرار دیا، ایک اور مہم رکن گیبی زوٹراو نے کہا کہ یہ لمحہ یقیناً ناقابل یقین ہے۔