عدالت عظمیٰ کو اطلاع دی گئی کہ بیشتر ریاستوں نے نوڈل افسر مقرر کردیا ہے لیکن گجرات ، کیرالا ، ناگالینڈ اور تمل ناڈو نے اب تک ایسا نہیں کیا ہے

 ملک بھر میں نفرت انگیز تقاریر کے بڑھتے ہوئے واقعات اور ہجومی تشدد کے معاملات کو روکنے کے لئے  سپریم کورٹ کی ہدایات کے مطابق کارروائی نہ کرنے پر گجر ات، کیرالا، ناگالینڈ اور تمل ناڈو کو نوٹس جاری کیا گیاہے۔ سپریم کورٹ نے ان  ریاستوں سے کہا  ہےکہ وہ بتائیں کہ انہوں نے نوڈل افسر کا تقرر کیوں نہیں کیا ؟    س سے قبل مرکزی حکومت نے سپریم کورٹ میں اسٹیٹس رپورٹ داخل کرتے ہوئے بتایا کہ ۲۸؍ریاستوں نےاپنی اپنی ریاستوں میں نوڈل افسروں کا تقرر کردیا ہے۔ جسٹس کھنہ اور جسٹس بھٹی کی بنچ کے سامنے  اے ایس جی کے ایم نٹراجن پیش ہوئے ۔ انہوں نے  عدالت کو بتایا کہ گجرات، کیرالا، ناگالینڈاور مغربی بنگال نے ابھی تک اپنا جواب داخل نہیں کیا ہے۔ نوڈل افسران کی تقرری کے بارے میں بھی کوئی اطلاع نہیں ہے۔سپریم کورٹ نے پوچھا کہ کتنی ریاستوں نے اپنا جواب داخل کیا ہے؟  اس درمیان بنگال حکومت نے عدالت کو بتایا کہ اس نے نوڈل افسر مقرر کیا ہے۔ اس پر عدالت نے سختی سے کہا کہ پھر اس کا ذکر حلف نامہ میں کیوں نہیں ہے جس پر بنگال کے وکیل نے کہا کہ یہ حال ہی کا معاملہ ہے جبکہ حلف نامہ پہلے تیار ہو چکا تھا اس لئے اندراج نہیں ہو سکا ۔ بہر حال کورٹ نے بنگال حکومت کے وکیل کی یقین دہانی کو  قبول کرلیا ۔
   ادھر اے ایس جی نے کہا کہ ۱۱؍اکتوبر کو ہوم سیکریٹری نے تمام ریاستوں کی میٹنگ بلائی تھی اور  اس تعلق سےاقدامات اور تعمیلی رپورٹس داخل کرنے کی ضرورت کے بارے میں بتایا تھا۔ اس کے بعد جسٹس سنجیو کھنہ نے کہا کہ ہم ریاستوں کو نوٹس جاری کریں گے۔  یہ ریاستیں بتائے کہ نوڈل افسر کا تقرر کیا گیا ہے یا نہیں؟ اور اگر اب تک نہیں کیا گیا تو کیوں نہیں کیا گیا ہے؟ عرضی گزار کی طرف سے پیش ہونے والے ایڈوکیٹ نظام پاشا نے کہا کہ اگر کوئی شخص نفرت انگیز تقریر کرتا ہے تو اسے دوبارہ جلسوں سے خطاب کرنے کی اجازت دی جاتی ہے۔ہمیں اس پر اعتراض ہے۔ اس دلیل پر کورٹ نے کہا کہ فی الحال ان ریاستوں کا جواب آجانے دیجئے اس کے بعد ہم گفتگو کریں گے ۔ اس کے بعد عدالت نے کیس کی اگلی سماعت اگلے سال ۵؍ فروری کو مقرر کردی ۔ 
 واضح رہے کہ نوڈل افسر مقرر کرنے والی ریاستوں میں مہاراشٹر بھی شامل ہے۔ اس نے بھی مرکز کو اطلاع دی ہے کہ یہاں نفرت انگیز تقاریر روکنے اور ہجومی تشدد کے واقعات روکنے کے لئے نوڈل افسر کا تقرر کیا گیا ہے۔ کورٹ کی ہدایت کے مطابق نوڈل افسر ضلع ایس پی کے رینک کا افسر ہونا چاہئے۔ تمام ریاستوں نے جو اطلاع دی ہے  اس کے مطابق ان کے یہاں ایس پی رینک کے افسر کو ہی نوڈل افسر مقرر کیا گیا ہے۔ واضح رہے کہ ملک میں بڑھتی نفرت انگیزی ، نفرت انگیز تقاریر اور ہجومی تشدد کے واقعات کو دیکھتے ہوئے سپریم کورٹ نے انتہائی سخت نوٹس لیا تھا اور مرکزی حکومت سمیت تمام ریاستی حکومتوں کو اس سلسلے میںسخت ہدایات جاری کی تھیں۔ انہی ہدایات اور کورٹ کی سختی کی وجہ سے گزشتہ ایک سال کے دوران ان واقعات میں کمی آئی ہے۔ اب اس معاملے میں کورٹ وقتاً فوقتاً جائزہ لینے کے لئے اور آگے کی کارروائی کیلئے سماعت کرتا ہے اور ہدایات جاری کرتا ہے۔