انٹرنیٹ کیلئے ایک مختلف نقطہ نظر پیش کرتے ہوئے، بیوک کوکتن نے کہا کہ اسے الگورتھمز یا ویب سائٹ پر گزارے گئے وقت کے پیمانوں کے بجائے حقیقی انسانوں اور حقیقی وابستگی کے گرد تعمیر کیا جانا چاہئے۔ اگلی نسل ایسی کمیونٹیز کی حقدار ہے جو مہربانی، تجسس اور اعتماد کا صلہ دیں۔

آرکٹ (Orkut) کے بانی اور ترکی سے تعلق رکھنے والے سافٹ ویئر انجینئر اورکٹ بیوک کوکتن (Orkut Büyükkökten) نے انٹرنیٹ کو حقیقی انسانوں کے گرد دوبارہ تعمیر کرنے کی اپیل کرتے ہوئے ایک کھلے خط اور دوبارہ شروع کی گئی ویب سائٹ Orkut.com کے ذریعے عوام کو اس تحریک میں شامل ہونے کی دعوت دی ہے۔ بیوک کوکتن، جنہوں نے دو دہائیوں سے زائد عرصہ قبل ابتدائی ترین سوشل نیٹ ورکس میں سے ایک پلیٹ فارم اورکٹ بنایا تھا، کہا کہ انہوں نے سوشل میڈیا کو غلط سمت میں جاتے دیکھا ہے۔ انہوں نے اپنے زندگی کے کام کو اب پہلے سے کہیں زیادہ فوری نوعیت کا قرار دیا۔

یہ بھی پڑھئے: نوبیل امن انعام کی فاتح نوی پِلے نے ٹرمپ کے ساتھ ایوارڈ شیئر کرنے پر مذاق کیا

بیوک کوکتن نے دو دہائیوں تک انسانی روابط کے بجائے صارفین کی توجہ حاصل کرنے کو ترجیح دینے کی روش کو اس تنزلی کا ذمہ دار ٹھہرایا اور دلیل دی کہ انگیجمنٹ کے گرد تیار کردہ فیڈز نے نئی نسل کو ایسے الگورتھمز کے حوالے کر دیا جنہوں نے ”انہیں عادی بنایا، تقسیم کیا اور مشتہرین کو فروخت کیا۔“ انہوں نے کہا کہ اگرچہ مصنوعی ذہانت غیرمعمولی ہے، لیکن یہ سوشل نیٹ ورکنگ کی بنیاد کو کمزور کر رہی ہے، وہ بنیاد یہ تھی کہ دوسری طرف ایک حقیقی انسان موجود ہوتا تھا۔ انہوں نے بوٹس، اے آئی کے تیار کردہ مواد، ڈیپ فیکس اور گمراہ کن ایجنٹس کو اس کے خطرات کے طور پر شمار کیا۔

موٹر سائیکل کی مرمت یا ایک ہی بس روٹ پر سفر کرنے جیسے مشترکہ مفادات کے گرد قائم اورکٹ کی اصل کمیونٹیز کو یاد کرتے ہوئے انہوں نے لکھا: ”ایک فیڈ میں آپ محض سامع ہیں، جبکہ ایک کمیونٹی میں آپ ایک رکن ہیں۔“ انہوں نے مؤقف اختیار کیا کہ اے آئی خوشی، امید، شکر گزاری یا محبت پیدا نہیں کر سکتی، یہی چیزیں زندگی کو جینے کے قابل بناتی ہیں۔ انہوں نے مزید کہا کہ انہوں نے جو کچھ بھی معنی خیز حاصل کیا ہے وہ انسانی تعلق سے ہی ملا ہے۔

یہ بھی پڑھئے: میرے ذریعے اے آئی کو دیئے گئے نئے نام کی حمایت نہیں کرنے والا وائٹ ہاؤس کا ’دشمن‘ ہے: ٹرمپ

انٹرنیٹ کیلئے ایک مختلف نقطہ نظر پیش کرتے ہوئے، بیوک کوکتن نے کہا کہ اسے الگورتھمز یا ویب سائٹ پر گزارے گئے وقت کے پیمانوں کے بجائے حقیقی انسانوں اور حقیقی وابستگی کے گرد تعمیر کیا جانا چاہئے۔ اگلی نسل ایسی کمیونٹیز کی حقدار ہے جو مہربانی، تجسس اور اعتماد کا صلہ دیں۔ انہوں نے تسلیم کیا کہ وہ اسے اکیلے دوبارہ تعمیر نہیں کر سکتے۔ انہوں نے انٹرنیٹ صارفین سے درخواست کی کہ وہ orkut.com پر جائیں، اپنے نام درج کریں، اور ایک حمایتی کارڈ بھیج کر واضح کریں کہ وہ کیوں چاہتے ہیں کہ کوئی ان کا ساتھ دے۔ انہوں نے لکھا کہ ”ایک الگورتھم زندگی کو جینے کے قابل نہیں بنا سکتا۔ لیکن ایک دوست بنا سکتا ہے۔ ایک کمیونٹی بنا سکتی ہے۔“ انہوں نے لوگوں پر زور دیا کہ وہ توجہ حاصل کرنے کے بجائے ایک دوسرے کی بہتری کیلئے کام کرنا شروع کریں۔