کروشیا کے صدر نے فلسطین کو تسلیم کرنے کے پارلیمانی عمل کا آغاز کرنے کا مطالبہ کیا، صدر کے مطابق فلسطینی عوام کے اپنے ملک کے حق کو تسلیم کرنا مشرق وسطی میں دیرپا امن قائم کرنے کا واحد طریقہ ہے۔

کروشیا کے صدر ظہران میلانووچ نے بدھ کو ملکی حکومت پر زور دیا کہ وہ فلسطین کو ایک خود مختار اور آزاد ریاست کے طور پر تسلیم کرنے کے پارلیمانی عمل کا آغاز کرے۔صدارتی بیان کے مطابق، زغریب میں فلسطینی وزیر خارجہ وارسن آغابیکیان کے ساتھ ایک ملاقات میں میلانووچ نے کہا کہ ’’غزہ میں جنگ اور انسانی المیے کو ختم کرنے کی جانب ایک قدم کے طور پر کروشیا کو فلسطین کو تسلیم کرنا چاہیے۔ فلسطینی عوام کے اپنے ملک کے حق کو تسلیم کرنا مشرق وسطی میں دیرپا امن قائم کرنے کا واحد طریقہ ہے۔‘‘میلانووچ نے غزہ میں شہریوں پر اسرائیلی حملوں اور اعلان کردہ قبضے کے منصوبے کی سخت مذمت بھی کی۔میلانووچ نے کہا کہ ’’وہ کروشیا سے جلد از جلد فلسطین کو تسلیم کرنے کی شدید وکالت کریں گے اور جمہوریہ کروشیا کی حکومت سے مطالبہ کر رہے ہیں کہ وہ کروشین پارلیمنٹ میں فلسطین کو تسلیم کرنے کا طریقہ کار شروع کرے۔‘‘