مہوبہ میں جھانسی- مرزا پور شاہراہ پر’ جین الفا‘کا احتجاج ،ہائی وے بلاک کردیا،طلبہ کے ساتھ پولیس کی زیادتی، لات مارکر اٹھایا ، دھکا مکی کی،بچوںکے ا حتجاج کے سبب تین گھنٹےتک ہائی وے جام رہا۔

جین زی کے بعد شہری سہولیات اورتعلیمی نظام کی خستہ حالی کے خلاف ملک کی متعدد ریاستوں میں جین الفا کےاحتجاج میں شدت آتی جارہی ہے۔ مہوبہ میں جھانسی- مرزا پور شاہراہ پر اس وقت ہنگامی صورتحال پیدا ہوگئی جب رائے پورہ کلاں گاؤں کے اسکولی بچوں( جین الفا) نے سڑک کی خستہ حالی اورجگہ جگہ پانی بھر نے کےخلاف ہائی وے کو بلاک کردیا۔ صورتحال اس وقت بد ترہوگئی جب وہاںموجودپولیس اہلکاروں نے چھوٹے طلبہ کےساتھ بدسلوکی کی۔ ایک پولیس افسر کےطلبہ کو لات مارنے کا ویڈیو بھی سامنے آیا ہے۔ موسلا دھار بارش کے درمیان تقریباً تین گھنٹے تک ٹریفک جام رہا جس کے باعث دونوں طرف گاڑیوں کی لمبی قطاریں لگ گئیں۔ بچوں کا الزام ہے کہ وہ مل آپریٹرز کی ہٹ دھرمی اور ذمہ دار اہلکاروں کی غفلت کے باعث سڑک پر آنے پر مجبور ہوئے۔ جائے وقوع پر پہنچی پولیس پر بچوں کے ساتھ بدسلوکی اور سڑک خالی کرنے کیلئے انہیں گھسیٹنے اورجبراً ہٹانے کے سنگین الزامات کا سامنا ہے۔

یہ بھی پڑھئے: مہاراشٹر: ۲۵؍ اسمبلی نشستوں میں ۴۰؍ فیصد سے زائد ووٹرز کے SIR فارم جمع نہیں ہوئے

رائےپورہ کلاں گاؤں کو ملانے والی تقریباً تین کلومیٹر طویل سڑک گڑھوں کی وجہ سے مکمل طور پر ٹوٹ پھوٹ کا شکار ہو چکی ہے۔ مختلف مقامات پر پانی جمع ہونے اور کھدائی کے باعث بچوں کا سکول جانا مشکل ہو گیا ہے۔ صورتحال اس قدر مخدوش ہے کہ ای رکشہ اور آٹو رکشہ اکثر الٹ جاتے ہیں جس سے کئی بچے زخمی ہو جاتے ہیں۔طلبہ کا الزام ہے کہ اس راستے پر کئی دالوں کی ملیں چلتی ہیں۔ ان ملوں سے بڑے، اووَر لوڈڈ ٹرکوں کی آمدورفت اور ملوں سے سیوریج کا پانی سڑک پر چھوڑے جانے سے سڑک مکمل طور پر تباہ ہوچکی ہے۔ جب بچے یا گاؤں والے احتجاج کرتے ہیں تو مل چلانے والے انہیں دھمکیاں دیتے ہیں۔ حکام کی بار بار شکایات کے باوجود جب کوئی کارروائی نہ ہوئی تو بچوں کے صبر کا پیمانہ لبریز ہو گیا۔ہنگامہ آرائی کی اطلاع ملتے ہی سٹی پولیس اسٹیشن اور تحصیلدار ابھیشیک مشرا جائے وقوع پر پہنچے۔ تاہم الزام ہے کہ پولیس نے حساسیت کا مظاہرہ کرنے کے بجائے بچوں کے خلاف طاقت کا استعمال کیا۔

یہ بھی پڑھئے: میٹا نے بچوں کی حفاظت پر’’آنکھیں بند رکھنے‘‘ کی پالیسی اپنائی ہے