بی جے پی کے’’ زہریلے ماڈل ‘‘کو تنقید کانشانہ بنایا، کہا : اس کے اسمارٹ سٹی ماڈل میں پانی میں زہر ،ہوا میں زہر ،دوامیں زہر اور زمین میں زہر ہے

اہل گاندھی نے سنیچر کو مدھیہ پردیش کے اندور میں آلودہ پانی کی وجہ سے ہلاک ہونے والوں  کے اہل خانہ اور دیگر متاثرین سے ملاقات کی اور ریاست کی بی جے پی حکومت کو سخت تنقید کا نشانہ بنایا۔اس دوران انہوں  نے فوت ہونےوالوں کے اہل خانہ کو ایک ایک لاکھ روپے امدادی چیک بھی سونپا۔
 انہوںنے  پانی پینے کی وجہ سے ہونےوالی اموات کو ’’بی جے پی کا زہریلا ماڈل‘‘ قرار دیا۔راہل گاندھی نے متاثرہ خاندانوں  کو ہر ممکن مدد کا یقین دلاتے ہوئے بی جے پی حکومت پر بگڑتی ہوئی صورتحال اور لاپروائی کی ذمہ داری سے بچنے کا الزام لگایا۔بعد میں انہوںنے ایکس پر لکھا کہ ’’ بی جے پی کی ڈبل انجن والی حکومت کے نئے اسمارٹ سٹی ماڈل میں پانی میں زہر ،ہوا میں زہر، دوامیں زہر اور زمین میں زہر ہے۔‘‘راہل گاندھی نے مزید لکھا کہ اگر کوئی اس پر جواب مانگے تو بلڈوزر چلایا جاتا ہے۔اس ماڈل میں غریبوں کی موت کا ذمہ دار کسی کو نہیں ٹھہرایا جاتا۔‘‘
  انہوںنے مطالبہ کیا کہ مجرموں کو سزا دی جائے اور متاثرین کو جلد از جلد مناسب علاج اور معاوضہ فراہم کیا جائے۔ کانگریس کے سینئر لیڈر نے صحافیوں سے بات کرتے ہوئے کہا کہ ملک میں  لوگ اب بھی صاف پانی تک سے محروم ہیں جو سنگین مسئلہ ہے۔ انہوں نے کہا کہ شہریوں کو صاف پانی فراہم کرنا اور آلودگی پر قابو پانا حکومت کی ذمہ داری ہے لیکن حکومت اس سلسلے میں مکمل طور پر ناکام ثابت ہو رہی ہے۔ انہوں نے کہا کہ بھاگیرتھ پورہ میں آلودہ پانی پینے سے کئی لوگ مر چکے ہیں اور بیمار ہو چکے ہیں۔ یہ صورتحال حکومت کی غفلت کی وجہ سے پیدا ہوئی ہے اور حکومت کو اس کی ذمہ داری قبول کرنی چاہیے۔