راہل گاندھی نے ٹویٹ کیاکہ بی جےپی کی سیاست ملک کیلئے نقصاندہ ہے اور یہ نفرت بے روزگاری کیلئے بھی ذمہ دار ہے
کانگریس کے سابق صدر راہل گاندھی نے کہا کہ بی جے پی کی منافرت آمیز اور فرقہ وارانہ سیاست کو صرف بھائی چارہ سے شکست دی جاسکتی ہے۔ راہل گاندھی نے اتوار کو ٹویٹ کے کہا کہ میں بھی یہی مانتا ہوں کہ بی جے پی کی نفرت سے بھری سیاست ملک کے لئے نقصاندہ ہے۔ خیال رہے کہ راہل گاندھی نے گزشتہ روز ٹویٹر پر ایک سوال کیا تھا کہ بی جے پی حکومت کی سب سے بڑی کمی کیا رہی؟ آج انہوں نے اس کا جواب دیا۔ راہل گاندھی نے ٹویٹر پر لکھا کہ ’’میں بھی یہی مانتا ہوں کہ بی جے پی کی نفرت بھری سیاست ملک کے لئے نقصان دہ ہے اور یہ نفرت ہی بے روزگاری کے لئے بھی ذمہ دار ہے۔‘‘ راہل گاندھی نے مزید کہا کہ ’’ملکی اور غیرملکی صنعت بغیر سماجی امن و سکون کے نہیں چل سکتی۔ روز بروز اپنے آس پاس بڑھتی ہوئی نفرت کو بھائی چارہ سے شکست دیں گے۔ کیا آپ میرے ساتھ ہیں؟‘‘راہل گاندھی نے اپنے اس ٹویٹ کے ذریعے پیغام دیا کہ ملک میں صنعتی ترقی اور سماجی ہم آہنگی کے لئے بھائی چارہ ضروری ہے اور نفرت بھری سیاست کو شکست دے کر ہی بھائی چارے کو فروغ دیا جا سکتا ہے۔
