ایک رپورٹ کے مطابق وہائٹ ہاؤس کی تردید کے باوجود ٹرمپ، نیتن یاہو انتخابات سے قبل ایران پر نئے حملوں پر غور کر رہے ہیں،حکام کا کہنا ہے کہ امریکی اور اسرائیلی افواج الرٹ پر ہیں کیونکہ ٹرمپ کے مشیر جنگ دوبارہ شروع کرنے پر منقسم ہیں۔

 نیوز سائٹ ایکسیوس نے منگل کو رپورٹ کیا کہ امریکی صدر ڈونالڈ ٹرمپ اور اسرائیلی وزیر اعظم نیتن یاہو نے دونوں ممالک میں آئندہ انتخابات سے قبل ایران کے خلاف ایک بڑا نیا آپریشن شروع کرنے پر تبادلہ خیال کیا۔رپورٹ میں دو امریکی حکام اور معاملے سے واقف دیگر ذرائع کا حوالہ دیتے ہوئے کہا گیا ہے کہ یہ بات چیت ٹرمپ کے عوامی طور پر یہ کہنے سے پہلے ہوئی کہ وہ امریکی وسط مدتی انتخابات سے پہلے ایران پر حملہ نہیں کریں گے۔ ایک ذریعے کے مطابق نیتن یاہو نے اسرائیلی انٹیلی جنس کا حوالہ دیا جس سے پتہ چلتا ہے کہ ایران اپنے جوہری پروگرام کی تعمیر نو پر کام کر رہا ہے، بشمول ممکنہ طور پر یورینیم افزودگی کے لیے پک ایکس ماؤنٹین سائٹ کو چلانا۔

یہ بھی پڑھئے: ٹرمپ کو عدالتی جھٹکا، سی این این، ایم ایس ناؤ، پولیٹیکو پر پابندی روک دی گئی

تاہم وائٹ ہاؤس کے ایک اہلکار نے یہ دعویٰ کرتے ہوئے کہ ٹرمپ نے نومبر میں وسط مدتی انتخابات سے پہلے حملوں کو مسترد کر دیا ہےاس بات کو غلط قرار دیا کہ دونوں لیڈروں نے جنگ دوبارہ شروع کرنے پر تبادلہ خیال کیا۔ مزید برآں ذرائع نے بتایا کہ دونوں افواج الرٹ پر ہیں اور ٹرمپ کے راستہ بدلنے کی صورت میں تیاریوں کو حتمی شکل دے رہی ہیں۔ ایک امریکی اہلکار نے ٹرمپ کے موقف کو غیر متعہد قرار دیتے ہوئے کہا کہ انہوں نے نیتن یاہو سے کہا کہ وہ عزم کیے بغیر تیاری کریں۔

یہ بھی پڑھئے: امریکہ انسانی حقوق کے محافظ کا کردار دوبارہ ادا کرے: نوبیل امن فاتح نوی پلّے

رپورٹ کے مطابق، امریکی وزیر دفاع پیٹ ہیگستھ اور امریکی سینٹرل کمانڈ کی قیادت نئے حملوں کے سب سے مضبوط حامی ہیں، جبکہ زیادہ تر مشیر مسلسل پابندیوں اور اقتصادی دباؤ کے حق میں ہیں۔ اسرائیلی آرمی چیف آف اسٹاف لیفٹیننٹ جنرل ایال ضمیر نے مبینہ طور پر امریکی جوائنٹ چیفس کے چیئرمین جنرل ڈین کین کو بتایا کہ تین ہفتوں کے اندر لڑائی ایران کے ممکنہ میزائل جوابی حملے کے پیش نظر اسرائیل کے۲۷؍ اکتوبر کے انتخابات کو ملتوی کرنے پر مجبور کر سکتی ہے۔رپورٹ میں مزید کہا گیا کہ قطری ثالث اب بھی تازہ ترین امریکی جوابی تجویز پر ایران کے جواب کا انتظار کر رہے ہیں۔