امریکی وزیر خارجہ مارکو روبیو نے اسرائیل کو خبردار کیا ہے کہ پارلیمان کا مغربی کنارے کے انضمام کے حوالے سے اقدام اور آباد کاروں کے تشدد سے غزہ امن معاہدے کو خطرہ ہے۔

امریکی وزیر خارجہ مارکو روبیو نے اسرائیل کو خبردار کیا ہے کہ پارلیمان کا مغربی کنارے کے انضمام کے حوالے سے اقدام اور آباد کاروں کے تشدد سے غزہ امن معاہدے کو خطرہ ہے۔ خبر رساں ادارے اے ایف پی کے مطابق اسرائیلی قانون سازوں نے بدھ کے روز مقبوضہ مغربی کنارے کے انضمام سے متعلق دو بلوں کی منظوری دی ہے جبکہ دوسری جانب تقریباً ایک ہفتہ قبل ہی صدر ڈونالڈ ٹرمپ کی ثالثی میں غزہ کی پٹی میں دو سال سے جاری اسرائیلی جارحیت کے خاتمے کیلئےمعاہدہ طے پایا ہے۔ 

یہ بھی پڑھئے: امریکہ نے روس پر دباؤ ڈالنے کیلئے روس کی دو بڑی آئل کمپنیوں پر پابندی عائد کی

وزیر خارجہ مارکو روبیو نے اسرائیل کے دورے کیلئے روانگی سے قبل صحافیوں سے بات چیت میں کہا کہ صدر ٹرمپ واضح کر چکے ہیں کہ وہ مغربی کنارے کے انضمام سے متعلق اقدام کی حمایت نہیں کر سکتے۔ انہوں نے مزید کہا کہ انضمام کے حوالے سے اقدامات ’امن معاہدےکیلئے ہیں۔ مارکو روبیو نے اسرائیل کے حوالے سے کہا ؔؔوہ جمہوریت ہیں، وہ ووٹ ڈالیں گے اور لوگ یہ مؤقف اپنائیں گے۔ لیکن اس موقع پر یہ ایک ایسا اقدام ہے جو ہمارے خیال میں نقصان دہ ہو گا۔ ‘مغربی کنارے میں فلسطینیوں کے خلاف انتہا پسند اسرائیلی آباد کاروں کی طرف سے بڑھتے ہوئے تشدد کے بارے میں سوال کے جواب میں مارکو روبیو نے کہا ’ہمیں کسی بھی ایسی چیز کے بارے میں تشویش ہے جس سے ہماری تمام کاوشوں کے غیر مستحکم ہونے کا خطرہ ہے۔’’

یہ بھی پڑھئے: اسرائیلی حملوں کے باوجود غزہ میں جنگ بندی برقرار ہے: ٹرمپ

امریکہ اسرائیل کا سب سے اہم فوجی اور سفارتی حامی ہے اور اب تک مارکو روبیو، وزیر اعظم بنجامن نیتن یاہو کے انتہائی دائیں بازو کے اتحادیوں کی طرف سے انضمام کے اقدام پر تنقید کرنے سے گریز کرتے رہے ہیں۔ تاہم، متعدد عرب اور مسلم ریاستوں نے خبردار کیا ہے کہ فلسطینی اتھاریٹی میں حماس کے اعتدال پسند حریفوں کی قیادت میں مغربی کنارے کا انضمام سرخ لکیر ہو گا۔ حالیہ مہینوں میں دائیں بازو کے سخت گیر وزراء مقبوضہ مغربی کنارے کے اسرائیل میں انضام کی اپنی دیرینہ خواہش کا تسلسل کے ساتھ اظہار کرتے رہے ہیں۔ صدر ڈونالڈ ٹرمپ پہلے ہی واضح کر چکے ہیں کہ وہ مغربی کنارے کے انضمام کی حمایت نہیں کریں گے۔ امریکی صدر نے ستمبر میں وہائٹ ہاؤس میں صحافیوں سے گفتگو کرتے ہوئے کہا تھا کہ ’میں اسرائیل کو مغربی کنارے کے انضمام کرنے کی اجازت نہیں دوں گا۔ ایسا نہیں ہونے والا۔ ‘