وزیراعظم کی صدارت میں منعقدہ میٹنگ میںیوگی آدتیہ ناتھ، پشکر سنگھ دھامی،اشوک گہلوت اور ممتا بنرجی نے شرکت کی، کے سی آر اور نتیش کمار نہیں پہنچے

 نیتی آیوگ کی گورننگ کونسل کی ساتویں میٹنگ اتوار کو وزیر اعظم نریندر مودی کی صدارت میںمنعقد ہوئی جس میں جی ۲۰؍چوٹی کانفرنس، فصلوں کے تنوع، شہری نظم و نسق، اعلی تعلیم اور ’۲۰۴۷ءمیں ہندوستان‘ پر زبردست غوروفکر کیا گیا۔ نیتی آیوگ کے نائب صدر سمن بیری اور میٹنگ میں شامل دیگر ممبران نے یہاں پریس کانفرنس میں بتایا کہ میٹنگ میں اگلے سال ملک میں ہونے والے جی ۲۰؍اجلاس کی تنظیم اور ریاستوں کے کردار پر بھی تبادلہ خیال کیا گیا۔ اس کے علاوہ فصلوں کے تنوع، قومی تعلیمی پالیسی کے نفاذ، اعلیٰ تعلیم، شہری نظم و نسق، انٹرنیٹ کنیکٹیویٹی اور ’سال ۲۰۴۷ء میں ہندوستان‘ پر وسیع تبادلہ خیال کیا گیا۔ بیری نےکہا کہ اگلا سال۲۰۲۳ءہندوستان کیلئے اہم ہوگا۔اس سال جی ۲۰؍سربراہی اجلاس ہندوستان کی صدارت میں ہندوستان میں منعقد ہوگا۔انہوں نےکہا کہ میٹنگ میں جی ۲۰؍ سربراہی اجلاس میںریاستوں کے تعاون پر تبادلہ خیال کیا گیا۔ انہوں نےکہا کہ تمام ریاستوں نےنئی تعلیمی پالیسی کے نفاذ پر اتفاق کیا ہے۔ میٹنگ میں ریاستوں اور مرکز کے زیر انتظام علاقوں  کے درمیان وفاقیت کے جذبے کےمطابق ماحول بنانے، امرت دور میں ملک کی ترقی کے سفر میں درپیش چیلنجوں کی نشاندہی کرنے اور ان کا حل تلاش کرنے پر زور دیا گیا۔ تیل کے بیجوں اور دالوں میں خود کفیل بننا بھی اجلاس کے ایجنڈے میں شامل تھا۔ میٹنگ میں اتر پردیش کے وزیر اعلی یوگی آدتیہ ناتھ، اتراکھنڈ کے وزیر اعلیٰ پشکر سنگھ دھامی، راجستھان کے وزیراعلیٰ اشوک گہلوت، مغربی بنگال کی وزیر اعلیٰ ممتا بنرجی اور دیگر ریاستوں کے وزرائے اعلیٰ اور مرکز کےزیر انتظام علاقوں کے منتظمین نےشرکت کی۔ تلنگانہ کے وزیر اعلیٰ کے۔چندر شیکھر راؤ اور بہار کے وزیراعلیٰ نتیش کمارمیٹنگ میں شریک نہیں ہوئے۔ مرکزی وزراء راجناتھ سنگھ، امت شاہ، نتن گڈکری، نرملا سیتا رمن اور ایس۔ جے شنکر بھی موجود تھے۔ جولائی ۲۰۱۹ء کے بعد گورننگ کونسل کا یہ پہلا اجلاس ہے۔