مرکزی وزیر دانوے نے بھی یہی بات دہرائی ، کہا کہ اسی طرح کی سیاست جاری رہی تو آگےکیا ہو گا کہا نہیں جاسکتا
EPAPER
Updated: November 23, 2022, 9:56 AM IST | Aurangabad
مرکزی وزیر دانوے نے بھی یہی بات دہرائی ، کہا کہ اسی طرح کی سیاست جاری رہی تو آگےکیا ہو گا کہا نہیں جاسکتا
مہاراشٹر کے گورنر بھگت سنگھ کوشیاری کے شیواجی مہاراج کے تعلق سے دئیے گئے متنازع بیان کی وجہ سے مہاراشٹر کی شندے حکومت گرنے کا امکان ظاہر کیا جارہا ہے۔ اس تعلق سے ادھو ٹھاکرے کی شیو سینا کے سینئر لیڈر سنجے رائوت نے یہ سنسنی خیز دعویٰ کیا ہے کہ ایکناتھ شندے کی ۵؍ ماہ پرانی حکومت اب زیادہ دن نہیں چل سکے گی۔ انہوں نے کہا کہ گورنر جس طرح سے بیان بازی کررہے ہیں وہ ظاہر کرتا ہے کہ وہ مہاراشٹر کی سیاست اور یہاں کی تہذیب سے ناواقف ہیں۔ اسی وجہ سے وہ بیان پر بیان داغ رہے ہیں اور ایکناتھ شندے ان کے ہر بیان پر صرف جز بز ہوکر رہ جاتے ہیں۔ رائوت کے مطابق لیکن اب پانی سر سے اونچا ہو گیا ہے اور ہمیں انتہائی باوثوق ذرائع سے اطلاع ملی ہےکہ شندے خیمے میں شدید بے چینی ہے او ر اسی وجہ سے ہم یہ کہہ رہے ہیں کہ یہ ای ڈی سرکار ۲؍ ماہ سے زیادہ نہیں چل سکے گی۔
یہی دعویٰ مرکزی وزیر رائو صاحب دانوے نے بھی کیا۔ انہوں نے اورنگ آباد ضلع کے کنّڑ میں ایک ریلی سے خطاب کے بعد میڈیا سے کہا کہ اس وقت مہاراشٹر میں جس طرح کی سیاست ہو رہی ہے اسے دیکھتے ہوئےسیاست کا اونٹ کب کس کروٹ بیٹھے گا کچھ کہا نہیں جاسکتا۔ انہوں نے کہا کہ مہاراشٹر کی سیاست میں کچھ بھی ناممکن نہیں ہے۔ اگر ادھو ٹھاکرے کانگریس اور این سی پی سے ہاتھ ملا سکتے ہیں ، ڈھائی سال سرکار چلاسکتے ہیں اور پھر ان کی سرکار گر سکتی ہے تو پھر کچھ بھی ممکن ہے۔ اگر کوئی کہے کہ ۲؍ ماہ میں یہ سرکار گر جائے گی تو یہ بھی ممکن ہے کیوں کہ اس سیاست کا کوئی بھروسہ نہیں ہے۔