ایئر مارشل اے پی سنگھ نے کہا کہ پاکستانی فضائیہ کے ۵؍ جنگی جہاز اور ایک نگرانی کےطیارہ کو تباہ کیا گیا ، انہوں نے اپنی مہم کو انتہائی کامیاب قرار دیا

ہندوستانی فضائیہ کے چیف امرپریت سنگھ نے آپریشن سیندور کے تعلق سے  بڑا بیان دیا ہے جو اس کی کامیابی کی طرف واضح اشارہ کر رہا ہے۔ایئرچیف  نے کہاکہ   ’آپریشن سیندور‘ کے دوران ہندوستانی فضائیہ نے پاکستان کے  ۶؍جنگی طیاروں کو مار گرایا تھا۔ انہوں نے یہ بھی بتایا کہ اس آپریشن کے ذریعہ پاکستان کو واضح اور سخت پیغام دیا گیا تھا۔ مار گرائے گئے طیاروں میں پاکستان کے ۵؍جنگی طیارے اور ایک جاسوسی طیارہ ’اے ڈبلیو اے سی ایس‘ تھا۔
 بنگلور میں ایک تقریب سے خطاب کرتے ہوئے فضائیہ چیف ایئر مارشل اے پی سنگھ نے تصدیق کی کہ ہندوستان نے آپریشن  کے دوران پاکستانی فضائیہ کے ۵؍جنگی طیاروں اور ایک اے ای ڈبلیو اینڈ سی ایس طیارہ کو تباہ کر دیا تھا۔ واضح رہے کہ پاکستان کو ہونے والے نقصان کی تعداد کے بارے میں فضائیہ کے اعلیٰ عہدہ سے اس طرح کی تصدیق پہلی بار کی گئی ہے۔ تقریب میں آپریشن سیندور کا ذکر کرتے ہوئے ایئر چیف مارشل نے کہا کہ ہمارے پاس بہاولپور(جیش  ہیڈکوارٹر) میں ہمارے ذریعہ پہنچائے گئے نقصان کی پہلے اور بعد کی تصویریں ہیں۔ یہاں تقریباً کوئی سامان نہیں بچا ہے۔ آس پاس کی عمارتیں تقریباً پوری طرح محفوظ ہیں۔ ہمارے پاس نہ صرف تصویریں ہیںبلکہ مقامی میڈیا کا بھی فوٹیج اور تصاویر ہیںجن کے ذریعہ ہم اندر کی تصویریں حاصل کر سکتے   ہیں۔ وہ مزید کہتے ہیں کہ ہماری کامیابی کی ایک اہم وجہ سیاسی عزائم ہونا تھا۔ ہمیں بہت واضح ہدایت دی گئی تھی۔ ہم پر کوئی پابندی نہیں لگائی گئی تھی۔ اگر کوئی پابندی تھی تو وہ خود سے پیدا کی ہوئی تھی۔ ہم نے طے کیا کہ کتنا آگے بڑھنا ہے۔ ہمیں منصوبہ بنانے اور اسے عملی جامہ پہنانے کی پوری آزادی تھی۔ ہمارے حملے سوچ سمجھ کرکئے گئے تھے ۔