صدر جمہوریہ مرمو نے یوم آزادی پر قوم کے نام خطا ب میں ملک کی معیشت، دفاع، ٹیکنالوجی کا ذکر کیا، بدعنوانی کیخلاف لڑائی جاری رکھنے کی تلقین کی

صدر جمہوریہ دروپدی مرمو نے  یوم آزادی سے قبل کی شب میں ملک کےعوام سے اپنے روایتی خطاب میں کئی اہم موضوعات کا ذکر کیا۔ انہوں نے ملک کے باشندوں سے دیسی مصنوعات کو اپنانے اور بدعنوانی کو جڑ سے اکھاڑ پھینکنے کا عہد کرنے کی اپیل کرتے ہوئے کہا کہ ملک کے ہر شہری کو صحت اور تعلیم کی سہولتوں تک مساوی رسائی ملنی چاہئے۔آل انڈیا ریڈیو اور دوردرشن پر ۷۹؍ویں یوم آزادی کے موقع پر قوم سےخطاب میں صدر جمہوریہ نے اقتصادی ترقی کو سماجی ترقی اور غربت کے خاتمے جیسے اہداف کے نقطہ نظر سے اہم قرار دیا۔ انہوں نے کہا کہ ہندوستان نے آزادی کے بعد خود کفیل ملک بننے کی طرف بہت ترقی کی ہے اور ملک اس وقت مضبوط گھریلو مانگ کے ساتھ دنیا کی سب سے تیزی سے ترقی کرنے والی معیشت ہےجو ہمارے لئے قابل فخر لمحہ ہے۔
 اپنے خطاب میں صدرمرمو نے آپریشن سیندور کو ہندوستان کے `پختہ عزم کا ایک تعارف قرار دیا اور کہا کہ اسے دہشت گردی کے خلاف انسانیت کی جدوجہد کی ایک مثال کے طور پر یاد رکھا جائے گا۔ انہوں نے کہا کہ آپریشن سیندور پوری  دنیا کے  لئے ایک پیغام ہے کہ ہم جارح نہیں بنیں گے لیکن اپنے شہریوں کی حفاظت کے لئے جوابی کارروائی سے دریغ بھی نہیں کریں گے۔ اس موقع پرصدر جمہوریہ نے شہریوں پر زور دیا کہ وہ ماحولیات اور حیوانات کے تحفظ اور ملک کو۲۰۴۷ء تک ایک ترقی یافتہ قوم بنانے کیلئے ہر ممکن تعاون کریں۔
  تقسیم ہند کی ہولناکیوں کا شکار ہونے والے مجاہدین آزادی اور ہمارے آباءواجداد کی قربانیوں کو یاد کرتے ہوئے صدر مرمو نے کہا کہ انصاف، آزادی اور مساوات  وہ اصول ہیں جو ہم نے آزادی کی جدوجہد کے دوران پوری دنیا کو  د ئیے تھے۔ اس موقع پر انہوں نے خلائی اور کھیلوں کی دنیا میں ملک کے ٹیلنٹ کی کامیابیوں کا بھی ذکر کیا۔ سودیشی کے جذبے کو بیدار کرنے پر زور دیتے ہوئے صدر نے کہاکہ سودیشی کا نظریہ `میک اِن انڈیا  اور خود کفیل  بھارت ابھیان جیسی قومی کوششوں کو متاثر کر رہا ہے۔ ہم سب کو یہ عہد کرنا ہوگا کہ ہم اپنے ملک میں بنی مصنوعات خریدیں گے اور استعمال کریں گے۔انہوں نے کہا کہ ہینڈلوم ڈے۲۰۱۵ء سے ہر سال ۷؍ اگست کو جدوجہد آزادی کے دوران۱۹۰۵ء میں شروع کی گئی سودیشی تحریک کی یاد میں منایا جاتا ہے۔ صدر مرمو نے کہا کہ مہاتما گاندھی نے سودیشی کے جذبے کو مزید مضبوط کیا تاکہ ہندوستانی کاریگروں کے خون  پسینے سے تیار کردہ مصنوعات کو فروغ دیا جا سکے۔انہوں نے کہاکہ آئیے ہم سب یہ عہد کریں کہ ہم گاندھی جی کے آئیڈیل کو عملی جامہ پہنائیں گے اور بدعنوانی کا مکمل خاتمہ کریں گے۔ انہوں نے کہاکہ ہماری اصلاحات اور پالیسیوں نے ترقی کیلئے ایک موثر پلیٹ فارم بنایا ہے۔ اس تیاری کے ساتھ میں ایک روشن مستقبل دیکھ سکتی ہوں جہاں ہم سب اپنی اجتماعی خوشحالی اور بہبود کیلئے جوش و خروش سے اپنا حصہ ڈالیں گے۔ اس مستقبل کی طرف ہم بدعنوانی کیلئے `زیرو ٹالرنس  کیساتھ اور غیر متزلزل گڈ گورننس کے ساتھ آگے بڑھ رہے ہیں۔انہوں نے بنیادی ڈھانچے، ٹیکنالوجی اور دیگر شعبوں میں تیز رفتار ترقی کا حوالہ دیتے ہوئے ہندوستانی معیشت کی مضبوطی کو اجاگر کیا۔ صدر نے کہاکہ  ہندوستان نے ایک خود کفیل ملک بننے کی راہ پر ایک طویل سفر طے کیا ہے اور بڑے اعتماد کے ساتھ آگے بڑھ رہا ہے۔ اقتصادی شعبے میں ہماری کامیابیوں کو واضح طور پر دیکھا جا سکتا ہے۔ گزشتہ مالی سال میں شرح نمو ۶ء۵؍ فیصد کے ساتھ ہندوستان دنیا کی بڑی معیشتوں میں سب سے تیزی سے ترقی کرنے والا ملک ہے۔ انہوں نے کہا کہ عالمی معیشت میں مسائل کے باوجود ملکی طلب تیزی سے بڑھ رہی ہے۔ مہنگائی کنٹرول میں ہے۔ برآمدات بڑھ رہی ہیں۔ تمام اہم اشارے معیشت کی مضبوط حالت کی عکاسی کر رہے ہیں۔ یہ ہمارے مزدور اور کسان بھائیوں اور بہنوں کی محنت اور لگن کے ساتھ سوچی سمجھی اصلاحات اور موثر معاشی انتظام کا نتیجہ ہے۔انہوں نے کہا کہ گڈ گورننس سے لوگوں کی بڑی تعداد کو غربت سے نکالا گیا ہے۔