حکومت اور سی جے پی نمائندوں کی گفتگو بے نتیجہ رہی ،دھرمیندر پردھان کو برخاست کرنے پر غور کیلئے حکومت نےآج تک کا وقت مانگا ، ملک گیر احتجاج بڑی حد تک کامیاب رہا ، جنتر منتر پر ہجوم میں زبردست اضافہ

زیر تعلیم دھرمیندر پردھان کے استعفے، امتحانی پرچوںکےلیک کی غیر جانبدارانہ تحقیقات اور تعلیمی نظام میں اصلاحات کے مطالبے پر کاکروچ جنتا پارٹی کی قیادت میں جنتر منتر پر طلبہ اور نوجوانوں کا احتجاج جمعہ کو بھی جاری رہا۔ ملک کی مختلف ریاستوں سے طلبہ، نوجوان، سماجی کارکن اور عام شہری مسلسل جنتر منتر پہنچ رہے ہیں، جس کے باعث جنتر منتر پر سرگرمیاں بہت تیزی کے ساتھ بڑھ گئی ہیں۔ طلبہ جن میں جین زی کی بڑی تعداد موجود ہے ،  یہاں پہنچنا شروع ہو گئے ہیں جس کی وجہ سے یہاں کی بھیڑ لاکھوں تک جاپہنچی ہے۔ حکومت کے خلاف احتجاج کا ان کا عزم اتنا بلند ہے کہ انہیں قابو میں کرنا اور حالات کو قابو میں رکھنا دہلی پولیس اور دیگر ایجنسیوں کیلئے درد سر بن گیا ہے۔
حکومت اور سی جے پی کی میٹنگ بے نتیجہ 
 دریں اثناء مرکزی حکومت اور احتجاجی تنظیم کاکروچ جنتا پارٹی کے نمائندوں کے درمیان کانسٹی ٹیوشن کلب میں تقریباً ۲؍ گھنٹے  طویل   مذاکرات  ہوئے۔ ان میں مرکزی وزیر جے پی نڈا، مرکزی وزیر جتیندر سنگھ  جبکہ سی جے پی کی جانب سے ترجمان سورو داس اور آشوتوش رانکا نے شرکت کی ۔ دونوں فریقوں کے درمیان مطالبات پر تفصیلی تبادلۂ خیال ہوا تاہم کوئی حتمی فیصلہ نہیں ہوسکا۔مرکزی حکومت نے مطالبات پر غور کرنے کیلئے سنیچر کی دوپہر تک مہلت مانگی ہے اور اس کے بعد اپنا باضابطہ جواب دینے کی یقین دہانی کرائی ہے۔ سی جے پی کے ترجمان سورو داس اور آشوتوش رانکا نے میڈیا سے گفتگو کرتے ہوئے کہا کہ تنظیم نے حکومت کے سامنے اپنے تمام مطالبات واضح طور پر رکھ دیئے ہیں۔ انہوں نے کہا کہ مرکزی وزیر تعلیم دھرمیندر پردھان کا استعفیٰ ان کا بنیادی مطالبہ ہے اور اس کے بغیر کوئی سمجھوتہ قبول نہیں کیا جائے گا۔تنظیم ہفتہ دوپہر تک حکومت کے جواب کا انتظار کرے گی، لیکن اگر مطالبات تسلیم نہ کیے گئے تو ملک گیر سطح پر نئی کال دی جائے گی اور تحریک کو مزید وسیع اور تیز کیا جائے گا۔
آج پھر گفتگو 
 انہوں نے یہ بھی بتایا کہ پیپر لیک کی وجہ سے خودکشی کرنے والے طلبہ کے اہل خانہ کو معاوضہ دینے اوراحتجاج کرنے والوں کے خلاف درج مقدمات واپس لینے کی حکومت نے ہامی بھری ہے۔ سنیچر کو دوپہر میں پھر میٹنگ ہوگی جس میں حکومت اپنا موقف واضح کرے گی ۔ 
ملک گیر احتجاج بڑی حد تک کامیاب رہا 
 دوسری جانب  سی جے پی کے کال پر ملک گیر سطح پر کیا گیا احتجاج بڑی حد تک کامیاب رہا ۔  پارٹی کے مقامی یونٹوں نے کئی اضلاع میں ضلع کلکٹریٹ کے سامنے احتجاج کیا اور کلکٹر کواپنے مطالبات کا میمورنڈم سونپا   ۔