ایکناتھ شندے اسی وقت نائب وزیر اعلیٰ بننے کو تیار جب انہیں وزارت داخلہ بھی دی جائے، ممبئی میں مہایوتی کی۲؍ اہم میٹنگیں رَد کرکے ستارا روانہ ہو گئے۔

مہاراشٹر اسمبلی کے انتخابات کے نتائج آکر ۶؍ دن گزر چکے ہیں اور ۲؍ تہائی سے زائد اکثریت حاصل کرنے کے باوجود اب تک مہا یوتی کی جانب سے اگلے وزیر اعلیٰ کے نام کا اعلان نہیں کیا گیا ہے۔ ذرائع سے ایسی خبریں مل رہی ہیں کہ دہلی میں اجیت پوار اور ایکناتھ شندے  کے ساتھ بی جے پی کے اعلیٰ کمان کی میٹنگ میں دیویندر فرنویس کو وزیر اعلیٰ بنانے پر اتفاق رائے  قائم ہوا  لیکن اعلان نہیں ہو سکا ہے کیوں کہ ایکناتھ شندے وزارت داخلہ کا قلمدان چاہتے ہیںاور امیت شاہ  دینے کو تیا رنہیں ہیں۔ اسی سے ناراض ہو کر  شندے دہلی سے لوٹ آئے اور فوراً اپنے آبائی گاؤںستار ا پہنچ گئے جہاں وہ ۲؍دن آرام کریں گے۔ ان کے اس قدم کی وجہ سے سیاسی حلقوں میں چہ میگوئیاں شروع ہو گئی ہیں۔  اسی ناراضگی کے سبب قلمدانوں کی تقسیم کے تعلق سے ممبئی میں مہایوتی کی ۲؍ میٹنگیں بھی رد ہو گئی ہیں۔ اس سے قلمدانوں کی تقسیم میں  تاخیر ہو سکتی ہے۔
ذرائع کے مطابق ۵؍ دسمبر یا اس کے بعد وزیر اعلیٰ، نائب وزرائے اعلیٰ اوردیگر قلمدانوں کا اعلان ہو سکتا ہے۔ اسی دوران یہ خبر بھی گشت کر رہی ہے کہ اجیت پوار کو حسب سابق نائب وزیر اعلیٰ کے ساتھ وزیر خزانہ بنایا جاسکتا ہے۔ ایکناتھ شندے کے خیمے کو ہاؤسنگ محکمے کے ساتھ کل ۱۳؍قلمدان دیئے جاسکتے ہیں لیکن شندے اسی شرط پر نائب وزیر اعلیٰ بننے کو تیار ہیں جب انہیں وزیر داخلہ کاقلمدان دیا جائے۔ مرکزی وزیر داخلہ امیت شاہ نے اس مطالبے کو مسترد کر دیا ہے۔ اس  لئے شندے دہلی سے واپس آنے کے بعد سیدھے اپنے آبائی گائوں روانہ ہو گئے۔

اس سے قبل  فرنویس، اجیت پوار اورایکناتھ شندے نے جمعرات کو دہلی میں میٹنگیں کیں۔ پہلے  فرنویس اور اجیت پوار کی سنیل تٹکرے کی رہائش گاہ پر میراتھن میٹنگ ہوئی، اس کے بعد دیر رات دہلی پہنچنے والے ایکناتھ شندے نےامیت شاہ کے ساتھ طویل (تقریباً ڈھائی گھنٹے) میٹنگ کی۔ اس میٹنگ کے بعد امیت شاہ اور ایکناتھ شندے نے علاحدہ میٹنگ کی۔ یہ بتایا جارہا ہے کہ میٹنگ میں وزارتی عہدوں اور محکموں کی تقسیم پر تبادلہ خیال کیا گیا تھا۔ شندے نے اصرار کیا کہ داخلہ، شہری ترقی اور تعمیرات عامہ سمیت کل ۱۲؍ عہدے دیئے جائیں جبکہ این سی پی نے پچھلی حکومت کے محکموں کو برقرار رکھنے کا مطالبہ کیا۔ بی جے پی نے شندے کو وزارت داخلہ نہ دے کر دوسرا کوئی محکمہ دینے کی پیشکش کی  لیکن شندے تیار نہیں ہوئے۔ بتایا جاتا ہے کہ پیر کو ایکناتھ شندے کی واپسی کے بعد ہی مہا یوتی اتحاد کی میٹنگ ہوگی اور قلمدانوں کی تقسیم کے بارے میں بات چیت ہو سکے گی۔