امریکی محکمہ دفاع نے اس بات کی تصدیق کی ہے کہ روسی اور یوکرینی فوجوں کے درمیان ڈونباس میں شدید قسم کی جھڑپیں جاری ہیں
EPAPER
Updated: July 09, 2022, 12:04 PM IST | Agency | Washington
امریکی محکمہ دفاع نے اس بات کی تصدیق کی ہے کہ روسی اور یوکرینی فوجوں کے درمیان ڈونباس میں شدید قسم کی جھڑپیں جاری ہیں
سلسل لڑائیوں کے درمیان امریکی محکمہ دفاع پنٹاگون نے تصدیق کی کہ روسی افواج مشرقی یوکرین کے علاقے ڈونباس میں جھڑپوں کے دوران پیش رفت کر رہی ہے۔ پنٹاگون نے جمعرات کو مزید کہا کہ آنے والے دن روسی فوج کی ان جگہوں کو برقرار رکھنے کی صلاحیت کا امتحان لیں گے جنہیں اس نے اپنے کنٹرول کا اعلان کیا ہے۔ امریکہ نے قبضے میں لئے گئے علاقوں کو روس کیلیئے ایک چیلنج قرار دیا۔ ایک امریکی ویب سائٹ کی رپورٹ کے مطابق امریکی محکمہ دفاع کا کہنا ہےکہ مہینوں قبل یوکرین میں فوجی آپریشن کے آغاز کے بعد سے روس کو جن مسائل کا سامنا ہے وہ اب بھی موجود ہیں۔یہ پیش رفت اس وقت سامنے آئی ہے جب ڈونباس کے علاقے میں لڑائی شدت اختیار کر گئی ہے اور روس کا اگلا ہدف اس علاقے پر قبضہ کرنا ہے۔جمعرات کو روسی فوج نے اپنے مقصد کے حصول کے لیے یوکرینی افواج کے ٹھکانوں اور فوجی انفراسٹرکچر پر حملے جاری رکھنے کا اعلان کیا۔دریں اثناء شہری مشرقی یوکرین میں بمباری سے متاثرہ شہروں سے انخلاء کا سلسلہ جاری رکھے ہوئے ہیں۔قابل ذکر ہے کہ روسی افواج نے چند روز قبل مشرقی یوکرین کے لوہانسک پر تقریباً مکمل کنٹرول مسلط کرنے کے بعد ڈونباس علاقے کے دوسرے حصے کی جانب پیش قدمی کی تھی۔ واضح رہے کہ یوکرین اور روس کی جنگ کو امریکہ اور روس کے درمیان درپردہ جنگ کہا جا رہا ہے۔ روس کا الزام ہے کہ یوکرین نے امریکہ اور یورپی ممالک کی ایما پر اسے آنکھیں دکھانی شروع کی تھیں اور اس کی فوجی پیش قدمیوں کے سبب ماسکو کو اپنی فوجیں یوکرین میں داخل کرنی پڑی تھیں۔ البتہ ۴؍ مہینوں بعد بھی روس یوکرین پر پوری طرح قبضہ نہیں کر سکا ہے۔