آسکر ۲۰۲۶ء نامزدگیاں:۲۰۲۶ء ایسا لگتا ہے کہ تیموتھی شالامے کے لیے بے حد خوش قسمت ثابت ہو رہا ہے۔ پہلے گولڈن گلوب میں کامیابی حاصل کی اور اب آسکر ۲۰۲۶ء میں تین نامزدگیاں حاصل کر کے تیموتھی نے تاریخ رقم کر دی ہے۔ اس کارنامے کے ساتھ وہ یہ تاریخ رقم کرنے والے سب سے کم عمر سپر اسٹار بن گئے ہیں۔

کہا جاتا ہے کہ آسکر کے اسٹیج تک پہنچ کر سنہری ٹرافی حاصل کرنے کی خواہش میں پوری زندگی گزر جاتی ہے، لیکن محض ۳۰؍ سالہ ہالی ووڈ اداکار تیموتھی شالامے نے ایسا کمال کر دکھایا کہ پوری دنیا میں ان کا چرچا ہونے لگا۔ دراصل اس وقت سب کی نظریں آسکر  ۲۰۲۶ء پر ٹکی ہوئی ہیں۔
ایک طرف جہاں آسکر کے بالکل قریب پہنچ کر ہندوستان  کا خواب ٹوٹ گیا، وہیں دوسری جانب اس سال آسکر میں ہالی ووڈ کے سب سے کم عمر سپر اسٹار تیموتھی شالامے کا جلوہ دیکھنے کو مل رہا ہے۔ صرف نامزدگی حاصل کر کے ہی تیموتھی نے ایک نیا ریکارڈ قائم کر دیا ہے۔ آخر تیموتھی نے ایسا کیا کارنامہ انجام دیا ہے کہ پوری دنیا میں ان کے نام کی گونج سنائی دے رہی ہے؟ 
آسکر میں ۳؍ نامزدگیاں حاصل کر کے تیموتھی نے تاریخ رقم کی
جیسے ہی ۹۸؍ویں آسکر ایوارڈز کی نامزدگیوں کا اعلان ہوا، ویسے ہی ہالی ووڈ کی تاریخ میں تیموتھی شالامے نے اپنا نام سنہرے حروف میں درج کرا لیا۔ آسکر ۲۰۲۶ء میں تیموتھی سب سے کم عمر ایسے اداکار بن گئے ہیں جنہیں ۹۸؍ویں آسکر ایوارڈز ۲۰۲۶ء میں تین باربہترین اداکارکے زمرے میں نامزد کیا گیا ہے۔

یہ بھی پڑھئے:زویا افروز نے ’پریا ‘ کے کردار کیلئے ہزاروں کلو میٹر کا سفر طے کیا تھا

تیموتھی کو فلم ’مارٹی سپریم‘ میں ٹیبل ٹینس کے جادوگر مارٹی ماؤزر کا شاندار کردار ادا کرنے پر بہترین اداکار کے زمرے میں نامزدگی ملی ہے۔ اس سے قبل بھی انہیں ’کال می بائے یور نیم‘ اور ’اے کمپلیٹ ان نون‘ کے لیے نامزد کیا جا چکا ہے اور اس بار انہیں مضبوط دعویدار مانا جا رہا ہے۔ ہالی ووڈ کے ماہرین کا ماننا ہے کہ اس بار تیموتھی شالامے کے ہاتھ سے آسکر ٹرافی پھسلنے والی نہیں ہے  اور وہ جیت کا پرچم لہرا کر ایک نیا تاریخ ساز لمحہ ضرور  بنائیں گے۔

یہ بھی پڑھئے:الکاراز نے تاریخ رقم کر دی، جوکووچ، ندال اور فیڈرر کو پیچھے چھوڑا

 کیا تیموتھی ہالی ووڈ کے لیجنڈز کو مات دے پائیں گے؟
اگرچہ تیموتھی کے لیے یہ راستہ کچھ مشکل ہو سکتا ہے، لیکن صرف نامزدگی حاصل کر کے ہی انہوں نے ہالی ووڈ کے بڑے اداکاروں جیسے لیونارڈو ڈی کیپریو اور ایتھن ہاک کو پیچھے چھوڑ دیا ہے۔ تاہم انہی ستاروں کے ساتھ اب آسکر میں بہترین اداکار کی دوڑ میں تیموتھی کا سخت مقابلہ ہونے والا ہے۔