کورینٹن ماؤٹیٹ کے خلاف فتح کے ساتھ آسٹریلین اوپن کے چوتھے راؤنڈ میں پہنچنے والے اس ہسپانوی کھلاڑی کا میجر مقابلوں میں ریکارڈ۱۳۔۸۷؍ ہے، جو اوپن ایرا میں پہلے ۱۰۰؍ میچوں میں بہترین آغاز کے لیے بیورن بورگ کے ریکارڈ کے برابر ہے۔

گرینڈ سلیم کی سطح پر ۱۰۰؍ میچ مکمل کرنے کے بعد کارلوس الکاراز نے ایک ایسا شاندار ریکارڈ قائم کیا ہے، جس نے انہیں عظیم کھلاڑیوں کی صف میں لا کھڑا کیا ہے۔ جمعہ کے روز کورینٹن ماؤٹیٹ کے خلاف فتح کے ساتھ آسٹریلین اوپن کے چوتھے راؤنڈ میں پہنچنے والے اس ہسپانوی کھلاڑی کا میجر مقابلوں میں ریکارڈ۱۳۔۸۷؍ ہے، جو اوپن ایرا میں پہلے ۱۰۰؍ میچوں میں بہترین آغاز کے لیے بیورن بورگ کے ریکارڈ کے برابر ہے۔

Victorious in his 💯th Grand Slam match 👑 pic.twitter.com/FXopxpsdAm

— #AusOpen (@AustralianOpen) January 23, 2026

الکاراز نے اس معاملے میں رافیل ندال اور جان میکنرو جیسے عظیم کھلاڑیوں کو بھی پیچھے چھوڑ دیا ہے، جن کا اپنے پہلے  ۱۰۰؍گرینڈ سلیم میچوں میں ریکارڈ ۱۴۔۸۴؍ تھا۔ اے ٹی پی رینکنگ میں عالمی نمبر ایک رہنے والے الکاراز اب ایک ایسا معیار قائم کر رہے ہیں، جہاں کھیل کے بڑے بڑے نام بھی اتنی جلدی نہیں پہنچ سکے تھے۔

یہ بھی پڑھئے:انڈونیشیا: غاروں میں ۶۷؍ ہزار ۸۰۰؍ سال پرانا دنیا کا قدیم ترین راک آرٹ دریافت

نوواک جوکووچ، جو۲۴؍ مرتبہ گرینڈ سلیم ٹائٹل جیتنے والے ریکارڈ ہولڈر اور میلبورن میں ۱۰؍ بار کے چیمپئن ہیں، انہوں نے اپنے پہلے ۱۰۰؍ گرینڈ سلیم میچوں میں ۲۱۔۷۹؍ کا ریکارڈ بنایا جبکہ سوئس لیجنڈ راجر فیڈرر نے ۲۲۔۸۰؍ کا ریکارڈ قائم کیا۔ الکاراز کے حریف یانک سِنر نے گزشتہ سال ومبلڈن میں اپنا ۱۰۰؍واں میجر میچ (۱۹۔۸۱) کھیلا تھا، جو اتفاق سے چیمپئن شپ میچ میں خود الکاراز کے خلاف تھا اور اس مقابلے میں اطالوی کھلاڑی نے کامیابی حاصل کی تھی۔

یہ بھی پڑھئے:شاہ رخ خان کی ’’کنگ‘‘ کرسمس ۲۰۲۶ء پر ریلیز ہوسکتی ہے، سدھارتھ نے اشارہ دیا

محض ۲۲؍سال کی عمر میں الکاراز چھ بار کے گرینڈ سلیم چیمپئن ہیں اور اس پندرہ روزہ ایونٹ میں مزید تاریخ رقم کرنے کے درپے ہیں۔ اگر وہ اپنا پہلا آسٹریلین اوپن خطاب جیتنے میں کامیاب ہو جاتے ہیں تو وہ کیریئر گرینڈ سلیم مکمل کر لیں گے اور یہ کارنامہ انجام دینے والے تاریخ کے سب سے کم عمر کھلاڑی بن جائیں گے۔