کنگ چارلس نے نائن الیون کو خراجِ عقیدت پیش کرنے کے لیے روایت توڑ دی ، بالکل ویسے ہی جیسے ان کی والدہ نے کیا تھا، نائن الیون کے دہشت گرد حملوں میں تقریباً۳۰۰۰؍ افراد ہلاک ہوئے تھے، پچیس سال بعد بھی اس المناک واقعے کی یادیں تازہ ہیں۔

ستمبر کو اس سال نائن الیون کے دہشت گرد حملوں کی ۲۵؍ویں برسی تھی، اور اسے یاد کرنے کے لیے کنگ چارلس نے شاہی روایت توڑ کر ۲۹۷۷؍ متاثرین کو خراجِ عقیدت پیش کیا، جن میں۶۷؍ برطانوی شہری بھی شامل تھے۔۲۵؍ویں برسی کے موقع پر چارلس نے ایک خاص اقدام کیا: چینجنگ آف دی گارڈ کی تقریب کے دوران کنگز گارڈ نے روایت توڑ کر امریکی قومی ترانہ بجایا۔برسی کے موقع پر محل نے اپنی تقریب کا ایک خاص ورژن بھی منعقد کیا، جس میں امریکی قومی ترانہ بجایا گیا۔ اس خاص اعزاز کا مشاہدہ کرنے کے لیے ڈیوک اور ڈچس آف گلوسٹر، امریکی سفیر وارن اسٹیفنز اور ان کی اہلیہ ہیریئٹ، وزیر خارجہ ایڈ ملیبینڈ اور سیکیورٹی منسٹر ڈین جاروس موجود تھے۔بکنگھم پیلس کے صحن میں ہونے والے گارڈ چینج کی ویڈیو شیئر کرتے ہوئے شاہی خاندان نے لکھا ”آج سے۲۵؍ سال پہلے نائن الیون کے المناک واقعات سے متاثر ہونے والے تمام افراد کو یاد کر رہے ہیں۔

یہ بھی پڑھئے: نیویارک: نائن اِلیون کی ۲۵؍ ویں برسی، مسلمانوں کے خلاف مارچ

واضح رہے کہ آج صبح بکنگھم پیلس کے صحن میں ایک یادگاری گارڈ چینج ہوا، جس کے دوران ڈیوک اور ڈچس آف گلوسٹر نے بادشاہ کی جانب سے رائل سلیوٹ لیا۔اس تقریب میں امریکی اور برطانوی دونوں قومی ترانوں، ’ہیم ٹو دی فالن‘ اور ’ایمیزنگ گریس‘ کی پیشکش شامل تھیں۔یہ بھی یاد رہے کہ امریکی قومی ترانہ بجانے کے فیصلے نے دنیا کو یاد دلایا کہ ملکہ الزبتھ دوم نے کس طرح صدیوں پرانی روایت توڑی تھی، جب انہوں نے۱۱؍ ستمبر۲۰۰۱؍ کے المناک دہشت گرد حملوں کے بعد۱۳؍ ستمبر۲۰۰۱ء کو چینجنگ آف دی گارڈ کے دوران کولڈ اسٹریم گارڈز سے ’دی اسٹار اسپینگلڈ بینر‘ بجانے کی درخواست کی تھی۔اس تقریب کے لیے۲۰۰۱ء میں ہزاروں افراد محل کے دروازوں کے باہر جمع ہوئے تھے۔ صرف یہی نہیں، بلکہ انہوں نے سینٹ پال کیتھیڈرل میں ایک یادگاری تقریب کے دوران امریکی ترانے کے ساتھ گایا بھی تھا، جو کسی برطانوی بادشاہ کا امریکی ترانہ گانے کا پہلا موقع تھا۔مزید برآں اس سال کے شروع میں، کنگ چارلس اور ملکہ کیملا نے بھی امریکہ کے سرکاری دورے کے دوران نیو یارک میں گراؤنڈ زیرو کا دورہ کیا تھا۔