امریکہ نے پاکستان کی جانب سے جماعت الدعوۃ کے سربراہ حافظ سعید اوران کے ساتھی ملک ظفراقبال کو دہشت گردوں کی مالی معاونت کے جرم میں دی گئی سزا کا خیر مقدم کرتے ہوئے اسے اہم اقدام قراردیا ہے۔

 واشنگٹن : امریکہ نے پاکستان کی جانب سےجماعت الدعوۃ کے سربراہ حافظ سعید اور ان کے ساتھی ملک ظفراقبال کو دہشت گردوں کی مالی معاونت کے جرم میںدی گئی سزا کا خیر مقدم کرتے ہوئے اسے اہم اقدام قرار دیا ہے۔گزشتہ روز لاہور کی انسداد دہشت گردی کی عدالت نےکالعدم جماعت الدعوۃ کے سربراہ حافظ سعید کو دہشت گردوں کی مالی معاونت کے۲؍مقدمات میں مجموعی طور پر۱۱؍سال قید کی سزا سنائی تھی۔
 حافظ سعید اور اس کےساتھی ملک ظفر اقبال کو دونوں مقدمات میںساڑھے۵؍سال، ساڑھے ۵؍ سال قید اور ۱۵؍،۱۵؍ہزار روپے جرمانے کی سزا سنائی گئی تھی۔یہ فیصلہ ایک ایسے موقع پرسنایا گیا ہے جب فنانشل ایکشن ٹاسک فورس (ایف اےٹی ایف) کی جانب سے آئندہ چند روز میں پاکستان کی گرے لسٹ میں موجودگی کےحوالے سے اہم فیصلہ متوقع ہے۔
 امریکہ کے جنوبی اور وسطی ایشیائی امور کے بیورو نے جمعرات کو سماجی رابطوں کی ویب سائٹ ٹوئٹر پر اس اقدام کا خیرمقدم کیا۔بیورو نے سزا کو پاکستان کے مستقبل کی جانب اہم قدم قرار دیتے ہوئے کہا کہ کالعدم لشکر طیبہ کی جانب سےکیے گئے جرائم پر ان کا احتساب اور عالمی برادری سے کیے گئے وعدوں کے مطابق پاکستان کی جانب سے دہشت گردوں کی مالی معاونت کرنے والوں کےخلاف کارروائی جیسے دونوں اقدامات آگے کی جانب ایک قدم ہے۔ بیورو نے ایک اور ٹوئٹ میں کہا کہ وزیر اعظم عمران خان خود یہ کہہ چکے ہیں کہ یہ پاکستان کے بہترین مفاد میں ہےکہ وہ غیر ریاستی عناصر کو اپنی سرزمین استعمال نہ کرنے دیں۔