ملی تنظیموں کے نمائندوں اور خواتین کے پُر امن احتجاج کے بعد پولیس کی کارروائی ،علاقے میں مراٹھی میں سیرت کی کتابیں بھی تقسیم کی گئیں

حضورِاقدسؐکی شان میں گستاخی کی مذموم جرأت کرنے والی بی جے پی کی ترجمان نپورشرما،بی جے پی لیڈرنوین جندل اور دیگر کے خلاف شہر میں زبردست احتجاج کے بعد پولیس کو ایف آئی آر درج کرنے پر مجبور ہونا پڑا۔شہرمیں وائرل گمنام بندکی اپیل نے مسلمانوں کو اور بطور خاص نوجوانوں کوبے چین تو کیا لیکن بر وقت بااثر شخصیات نے اس بات کا نوٹس لیتے ہوئے رسولؐ  کی شان میں گستاخی کی مرتکب  ا فرادکے خلاف ایف آئی آر درج کرنے ،شہر میں بڑے ہورڈنگس لگانے اور ہم وطن افراد تک مراٹھی زبان میں سیرت کی کتابیں تقسیم کرنے کا فیصلہ کیا جو کلی طور پر بااثر رہا۔ گستاخی کی مذموم حرکت کو ۱۶؍دن گزر جانے کے باوجود شہر میں کسی قسم کا احتجاج درج نہیں کیا گیا تھا ۔اس دوران۱۰؍ جون بروز جمعہ بند کی اپیل  پرمبنی گمنام پیغام  کے بعد لوگ اپنے طور پر کاروباربندکرنے اور جلوس و احتجاج کی خواہش ظاہر کرنے لگے لیکن شہر کے بااثر افراد نے ۹؍ جون کو شہرکی تمام دینی ،ملی و سیاسی جماعتوں کی ایک نشست شاہین ہال ایوت محل میں منعقد کی۔اس نشست میں ملک کے موجود حالات کے پیش نظر ریلی ،جلوس ،دھرنا یا احتجاج کے بجائے ایف آئی آر درج کرنے ،شہر میں احتجاجی ہورڈنگز لگانے، سڑکوں پرگستاخی کرنے والوں کی تصاویر چسپاں کرنے اور دیگر مذاہب کے لوگوں میں رسول اکرم ؐ کی سیرت پر مراٹھی ،ہندی ،انگریزی کی کتابیں تقسیم کرنے کا فیصلہ کیا گیا۔جمعہ کے دن بعد نماز مغرب شہر کی بااثر شخصیات و مستورات نے سٹی پولیس تھانے پہنچ کر ایف آئی آر درج کرنے کا مطالبہ کیا۔اس موقع پر خواتین نے شدید رخ اختیار کرتے ہوئے یہ بات کہی کہ جب تک ایف آئی آر درج نہیں کی جاتی ہم رات بھر تھانے میں ہی دھرنا دیں گے۔اس شدیددباؤ میں تھانہ انچارج نے ضلع ایس پی سے بات کرکے دلاسہ دیا کہ کل صبح ۱۱؍ بجے ایس پی  نے ملاقات کے بعد  ایف آئی آر درج کرنے کی ہامی بھری ہے۔لہٰذا بروز سنیچر ۱۱؍ جون کو ضلع ایس پی سے ملاقات کے بعدمحمد احتشام محمد شکیل کی شکایت پر نپور ونئے شرما،نوین اوم جندل ،ایڈیٹر ان چیف ٹائمس ناؤ،ٹی وی اینکرنوین کمارکے خلاف دفعہ ۱۵۳ (اے) اور ۲۹۵(اے) کے تحت کیس درج کیا گیا۔
 اس پُر امن احتجاج کے بعد ایف آئی آر درج ہونے سےمسلمانوں نے خوشی کا اظہار کیا۔اس موقع پر تمام دینی تنظیموںکے ذمہ داران و علمائے کرام،سماجی کارکنان  اوروکلاء حضرات موجود تھے۔