ایک مریض کے ڈاکٹر پر چاقو سے حملہ کرنے کے بعد سیکوریٹی کا مطالبہ کرتے ہوئے ڈاکٹروں نے ہڑتال کر دی تھی

یہاں کے وسنت راؤ نائک گورنمنٹ میڈیکل کالج کے ریزیڈنٹ ڈاکٹروں نے ایک مریض کے ڈاکٹر پر چاقو سے حملہ کرنے کے بعد سیکوریٹی کا مطالبہ کرتے ہوئے ہڑتال کر دی تھی۔ کالج کے ڈین ڈاکٹر ملند پھول پاٹل کی طرف سے ریزیڈنٹ ڈاکٹرس کے مطالبات تسلیم کرنے کی یقین دہانی کے بعد ریزیڈنٹ ڈاکٹرس کی ایسوسی ایشن ’مارڈ‘ نے دیر رات احتجاج ختم کردیا۔
  اسپتال کی خدمات آسانی سے دوبارہ شروع ہو نے کے بعد مریضوں نے راحت کی سانس لی ہے۔واضح رہے کہ جمعرات۵؍ جنوری کو اسپتال کے وارڈ نمبر۲۵؍ میں جب ڈاکٹر کا راؤنڈ چل رہا تھا تو سورج ٹھاکر نامی مریض نے ڈاکٹر پر چاقو سے حملہ کر دیا تھا۔ جس میں ڈاکٹر جبیستان پال اور ان کا ساتھی ڈاکٹر زخمی ہوگیا تھا ۔اس واقعہ سے ناراض ریزیڈنٹ ڈاکٹروں نے کام بند کرتے ہوئے جمعہ سے ہڑتال شروع کردی تھی۔ میڈیکل کالج میں دو دن تک مریضوں کی خدمات متاثر رہیں۔ ریزیڈنٹ ڈاکٹرس کی مارڈ ایسوسی ایشن نے خبردار کیا تھا کہ جب تک ڈاکٹروں کے تحفظ کی یقین دہانی نہیں کرائی جاتی ہڑتال جاری رہے گی۔ شام کو سپرنٹنڈنٹ آف پولیس ڈاکٹر  پون بنسود نے احتجاج کرنے والےڈاکٹروں سے ملاقات کی اور میڈیکل کالج کے آس پاس پولیس چوکی شروع کرنے کا وعدہ کیا ۔ میڈیکل کالج کے ڈین ڈاکٹر ملند پھول پاٹل نے احتجاج کرنے وا لے  ریزیڈنٹ ڈاکٹرس سے ملاقات کی اور مطالبات تسلیم کرنے کی یقین دہانی کرائی۔ نیز طبی خدمات جاری کرنے کی بھی درخواست کی۔اس سے کشیدگی کم ہوئی اور رہائشی ڈاکٹروں نے ہڑتال ختم کر دی۔