ہندوستان کو ۲۰۲۱ء میں آسٹریلیا کا دورہ کرنا ہےاور میزبان آسٹریلیا دنیا کی موجودہ نمبر ون ٹیم ہندوستان سے ۲ ڈے نائٹ ٹیسٹ کھیلنا چاہتاہے

 میلبورن : ہندوستان کو۲۰۲۰ءمیں آسٹریلیا کا دورہ کرنا ہے اور میزبان آسٹریلیا دنیا کی موجودہ نمبر ون  ٹیم ہندوستان  سے ۲؍ ڈے نائٹ ٹیسٹ کھیلنا چاہتا ہے۔ ہندوستان  نے حال ہی میں کولکاتا  میں بنگلہ دیش کے خلاف اپنا پہلا ڈے نائٹ ٹیسٹ کھیلا تھا اور اسے اننگز سے جیت حاصل ہوئی تھی۔ آسٹریلیا نے بھی پاکستان سے اپنا حالیہ ڈے نائٹ ٹیسٹ اننگز سے جیتا تھا۔ آئی سی سی ٹیسٹ چمپئن شپ میں ہندوستان۳۶۰؍  پوائنٹس کے ساتھ پہلے اور آسٹریليا ۱۷۶؍پوائنٹس کے ساتھ دوسرے نمبر پر ہے۔ اگر آسٹریلیا کا یہ منصوبہ کامیاب ہوجاتا ہے تو یہ ایسی  پہلی سیریز ہوگی جس میں ایک سے زیادہ ڈے نائٹ ٹیسٹ ہوں گے۔ کرکٹ آسٹریلیا (سی اے) کے صدر ارل ایڈنگس کی قیادت میں سی اے کی ایک ٹیم ہندوستانی کرکٹ کنٹرول بورڈ (بی سی سی آئی) کے نئے عہدیداروں سے جنوری میں محدود اووروں کی سیریز کے وقت ملاقات کرے گی  تاکہ سیریز میں ۲؍ ڈے نائٹ ٹیسٹ کے امکانات تلاش کئے  جاسکیں ۔