ایشین گیمز ۲۰۲۶ء کے مردوں کے ٹی۲۰؍ کرکٹ مقابلے میں مسلسل بارش نے تمام چاروں کوارٹر فائنل مقابلوں کو متاثر کیا، جس کے نتیجے میں ایک بھی گیند کھیلے بغیر چاروں میچ منسوخ ہوگئے۔

ایشین گیمز ۲۰۲۶ء کے مردوں کے ٹی۲۰؍ کرکٹ مقابلے میں مسلسل بارش نے تمام چاروں کوارٹر فائنل مقابلوں کو متاثر کیا، جس کے نتیجے میں ایک بھی گیند کھیلے بغیر چاروں میچ منسوخ ہوگئے۔ اس کے بعد ٹورنامنٹ کی اعلیٰ درجہ بندی کی بنیاد پر ہندوستان، پاکستان، سری لنکا اور بنگلہ دیش  نے سیمی فائنل میں جگہ بنالی ہے۔  پیر کو نیشین کے  کورَوگی اسپورٹس پارک  میں دو کوارٹر فائنل کھیلے جانے تھے۔ پہلے میچ میں پاکستان کا مقابلہ ہانگ کانگ سے، جبکہ دوسرے میں ہندوستان  کا سامنا افغانستان سے ہونا تھا۔ تاہم مسلسل بارش اور میدان کی خراب صورتحال کے باعث دونوں میچ شروع ہی نہیں ہوسکے اور ٹاس بھی نہیں ہوسکا۔ ٹورنامنٹ کے قواعد کے تحت زیادہ بہتر درجہ بندی رکھنے والی ٹیم کو سیمی فائنل میں جانے کا حق ملا، جس کے نتیجے میں پاکستان اور ہندوستان اگلے مرحلے میں پہنچ گئے۔  

یہ بھی پڑھئے:شاہ رخ خان کی فلم’’کنگ‘‘ میں ۷۰؍ فیصد بالی ووڈ ہے: سوربھ شکلا

منگل کو بھی موسم نے کرکٹ کا ساتھ نہیں دیا۔ تیسرا کوارٹر فائنل سری لنکا اور نیپال کے درمیان جبکہ چوتھا کوارٹر فائنل بنگلہ دیش اور ملائیشیا کے درمیان ہونا تھا، لیکن دونوں مقابلے بھی مسلسل بارش کے باعث بغیر ٹاس کے منسوخ ہوگئے۔ نتیجتاً سری لنکا اور بنگلہ دیش نے اپنی بہتر درجہ بندی کی بنیاد پر سیمی فائنل میں جگہ بنالی۔   اس طرح ایشین گیمز ۲۰۲۶ء کے مردوں کے کرکٹ مقابلے کے آخری چار میں ہندوستان، سری لنکا، پاکستان اور بنگلہ دیش  شامل ہوگئے ہیں۔ ہندوستان اور پاکستان اس مرحلے میں پہنچنے والی چار اعلیٰ درجہ بندی والی ٹیموں میں شامل تھے اور کوارٹر فائنل سے براہِ راست سیمی فائنل میں پہنچے۔ 
 سیمی فائنل مرحلے میں  ہندوستان کا مقابلہ سری لنکا  سے ہوگا، جبکہ دوسرے سیمی فائنل میں پاکستان اور بنگلہ دیش  آمنے سامنے ہوں گے۔ دونوں میچ یکم اکتوبر کو نیشین کے کورَوگی اسپورٹس پارک میں کھیلے جائیں گے۔ دستیاب شیڈول کے مطابق  ہندوستان  اور سری لنکا کا سیمی فائنل ہندوستانی وقت کے مطابق صبح  ۱۰؍ بجے  شروع ہوگا، جبکہ پاکستان اور بنگلہ دیش کا مقابلہ صبح  ساڑھے ۵؍ کھیلا جائے گا۔ 

یہ بھی پڑھئے:کارٹونسٹ ستیش آچاریہ کا انسٹاگرام اکاؤنٹ ہندوستان میں بلاک

بارش کی وجہ سے کوارٹر فائنل مرحلے میں ایک بھی مکمل میچ نہ ہونے کے بعد اب سیمی فائنل مقابلوں کے انعقاد پر بھی توجہ مرکوز ہے۔ منتظمین کے لیے میدان کو دوبارہ کھیل کے قابل بنانا ایک اہم چیلنج ہوگا۔ رائٹرز کے مطابق منتظمین نے امید ظاہر کی ہے کہ موسم میں بہتری اور دھوپ کے ساتھ میدان کو خشک کرنے کے لیے استعمال ہونے والے آلات کی مدد سے سیمی فائنل مقابلے مقررہ پروگرام کے مطابق کرائے جاسکیں گے۔ایشین گیمز ۲۰۲۶ء کے مردوں کے کرکٹ مقابلے کا  کانسہ کا تمغہ اور فائنل بھی کورَوگی اسپورٹس پارک میں ہی کھیلا جائے گا۔ دونوں مقابلے ۳ ؍اکتوبر کو شیڈول ہیں۔  بارش کے باعث کوارٹر فائنل مرحلے میں افغانستان، نیپال، ہانگ کانگ اور ملائیشیا کا سفر بغیر میچ کھیلے ختم ہوگیا، جبکہ ہندوستان، پاکستان، سری لنکا اور بنگلہ دیش اب ایشین گیمز کرکٹ میں تمغے کے حصول کی دوڑ میں شامل ہیں۔