بنگلہ دیش نے منگل کو ایشیا کپ کے کرو یا مرو کے میچ میں افغانستان کو۸؍رن سے شکست دے کر سپر۴؍ تک پہنچنے کی اپنی امیدوں کو زندہ رکھا۔ بنگلہ دیش نے مقررہ ۲۰؍ اوورس میں ۵؍ وکٹ پر ۱۵۴؍رن کا مشکل اسکور بنانے کے بعد افغانستان کو ۲۰؍ اوور میں۱۴۶؍ رن پر آؤٹ کر دیا۔

بنگلہ دیش نے منگل کو ایشیا کپ کے کرو یا مرو کے میچ میں افغانستان کو۸؍رن سے شکست دے کر سپر۴؍ تک پہنچنے کی اپنی امیدوں کو زندہ رکھا۔ بنگلہ دیش نے مقررہ ۲۰؍ اوورس میں ۵؍ وکٹ پر ۱۵۴؍رن کا مشکل اسکور بنانے کے بعد افغانستان کو ۲۰؍  اوور میں۱۴۶؍ رن پر آؤٹ کر دیا۔ اس فتح کے بعد بنگلہ دیش کے ۴؍ پوائنٹس ہو گئے ہیں۔ سری لنکا کے بھی ۴؍ پوائنٹس ہیں اور اس گروپ سے سپر۴؍ میں جانے والی ٹیموں کا فیصلہ سری لنکا اور افغانستان کے درمیان آخری گروپ میچ سے ہوگا۔  افغانستان کا نیٹ رن ریٹ اب بھی بہت اچھا ہے اور اگر اسے صرف اپنے آخری میچ میں سری لنکا کو ہرانا ہوگا تو وہ سپر فور میں پہنچ جائے گا۔ 

Bangladesh get over the line! ✌️

It went down to the wire but 🇧🇩 channeled their Tiger spirit to fight until the end, picking up a win and staying alive in the tournament.#BANvAFG #DPWorldAsiaCup2025 #ACC pic.twitter.com/eNNBUO9B0i

— AsianCricketCouncil (@ACCMedia1) September 16, 2025

افغانستان کے پاس اگلے راؤنڈ میں پہنچنے  کا سنہری موقع تھا لیکن ان کی ٹیم نے یہ موقع گنوا دیا۔ بنگلہ دیش کی ٹیم ابھی تک ٹورنامنٹ میں موجود ہے۔ اب افغانستان کو سری لنکا کے خلاف میچ جیتنا ہے، اگر وہ  میچ بھی ہار گیا تو اسے ٹورنامنٹ سے باہر ہونا پڑے گا۔ پہلی اننگز میں کم رن بنانے کے باوجود نسیم سمیت تمام گیند بازوں نے شاندار بولنگ کی۔ مستفیض الرحمان نے۱۹؍ویں اوور میں شاندار بولنگ کرتے ہوئے صرف ۵؍ رن  دیئے اور کپتان راشد خان سمیت ۲؍ وکٹ حاصل کئے۔ نور احمد نے آخری اوور میں ۲؍ چھکے لگائے لیکن آخری گیند پر آؤٹ ہوتے ہی بنگلہ دیشی کھلاڑی خوشی سے جھوم اٹھے۔  مستفیض نے ۴؍ اوورس میں ۲۸؍ رن دے کر ۳؍ وکٹ حاصل کئے۔ نسیم احمد، تسکین احمد اور رشاد حسین نے ۲۔۲؍ وکٹ لے کر بنگلہ دیش کو فتح دلانے میں اہم کردار ادا کیا۔  افغانستان کی جانب سے رحمان اللہ گرباز نے۳۵، عظمت اللہ عمرزئی نے۳۰، کپتان راشد نے۲۰؍ اور نور احمد نے۱۴؍رن بنائے تاہم افغان ٹیم فتح سے چند رن کی دوری پر رہ گئی۔ 
قبل ازیں بنگلہ دیش نے ٹاس جیت کر پہلے بیٹنگ کا فیصلہ کیا۔ بنگلہ دیش کی جانب سے تنزید حسن نے ۵۲؍رن  اور سیف حسن نے۳۰؍ رن  بنا کر بنگلہ دیش کو اچھا آغاز فراہم کیا جس سے بنگلہ دیش بڑے اسکور کی جانب بڑھتا ہوا نظر آ رہا تھا۔ توحید ہردوئے نے۲۶؍ رن بنائے۔ ذاکر علی اور نورالحسن نے ۱۲۔۱۲؍ رن بنائے۔ 
تنزید حسن نے پہلے۱۰؍ اوورس میں۳۱؍ گیندوں پر ۴؍ چوکے اور ۳؍ چھکے لگا کر بنگلہ دیش کے اسکور میں اضافہ جاری رکھا۔ تاہم ۱۱؍ویں اوور کی پہلی گیند پر لٹن داس کا آؤٹ ہونا بنگلہ دیش کے لیے مہنگا ثابت ہوا جس سے ٹیم آخر تک سنبھل نہ سکی۔  تاہم بنگلہ دیش نے افغانستان کی عمدہ بولنگ کے خلاف اچھا اسکور کھڑا کیا۔ راشد خان، نور احمد، محمد نبی اور غضنفر جیسے بولرس کا سامنا کرنا کبھی آسان نہیں تھا، لیکن بلے بازوں نے چیلنج کا بخوبی سامنا کیا ۔ افغانستان کی جانب سے کپتان راشد خان اور نور احمد نے۲۔۲؍ وکٹ حاصل کئے اور آخری۱۰؍ اوورس میں بنگلہ دیش پر دباؤ برقرار رکھا۔ آخری۱۰؍ اوورس میں بنگلہ دیش نے۶۷؍ رن  جوڑے اور ۴؍ وکٹ گنوا  دیئے۔