• Tue, 17 November, 2026
  • EPAPER

Inquilab Logo Happiest Places to Work

کرسٹیانو رونالڈو کا پراسرار اشارہ، پوچھا ’’کیا آپ اس کا مطلب سمجھ پائے؟‘‘

Updated: November 17, 2026, 7:02 PM IST | Lisbon

پرتگال کے عالمی شہرت یافتہ فٹبالر کرسٹیانو رونالڈو ایک بار پھر سوشل میڈیا پر اپنی ایک پراسرار حرکت کے باعث خبروں میں آگئے ہیں۔ سعودی فٹبال کلب النصر کے اسٹار کھلاڑی نے سوشل میڈیا پر ایک ویڈیو شیئر کی ہے، جس میں وہ ہاتھ کی انگلیوں سے ایک خاص اشارہ کرتے ہوئے دکھائی دے رہے ہیں۔

Ronaldo.Photo:X
رونالڈو۔تصویر:ایکس

 پرتگال کے عالمی شہرت یافتہ فٹبالر کرسٹیانو رونالڈو ایک بار پھر سوشل میڈیا پر اپنی ایک پراسرار حرکت کے باعث خبروں میں آگئے ہیں۔ سعودی فٹبال کلب النصر   کے اسٹار کھلاڑی نے سوشل میڈیا پر ایک ویڈیو شیئر کی ہے، جس میں وہ ہاتھ کی انگلیوں سے ایک خاص اشارہ کرتے ہوئے دکھائی دے رہے ہیں۔ اس ویڈیو کے ساتھ انہوں نے مداحوں سے سوال کیا کہ ’’کیا آپ اب تک اس کا مطلب سمجھ پائے ہیں؟‘‘ رونالڈو کے اس مختصر پیغام نے دنیا بھر میں ان کے مداحوں کے درمیان تجسس پیدا کردیا ہے اور سوشل میڈیا پر اس اشارے کے ممکنہ مطلب کے بارے میں مختلف قیاس آرائیاں شروع ہوگئی ہیں۔۴۱ ؍سالہ کرسٹیانو رونالڈو سفید رنگ کی پولو شرٹ پہنے ویڈیو میں کیمرے کی جانب دیکھتے ہوئے مسکراتے ہیں اور اپنی انگلیوں سے ایک مخصوص شکل بناتے ہیں۔ انہوں نے اپنی پوسٹ کے ساتھ آنکھوں اور ہنسی والے ایموجیز بھی استعمال کیے، جس سے ظاہر ہوتا ہے کہ وہ فی الحال اس اشارے کا راز خود ظاہر کرنے کے بجائے مداحوں کو اس کا مطلب تلاش کرنے کا موقع دینا چاہتے ہیں۔ یہ ویڈیو ۱۶ نومبر کو سوشل میڈیا پلیٹ فارم ایکس پر شیئر کی گئی تھی۔

یہ بھی پڑھئے:ہندوستان اور آسیان کا مستقبل مسابقت سے نہیں، تعاون سے طے ہونا چاہیے: مودی

رونالڈو کے اس پراسرار اشارے کے حوالے سے سب سے زیادہ مقبول قیاس آرائی یہ ہے کہ اس کا تعلق ان کے کریئر کے ایک ہزار گول مکمل کرنے کے ہدف سے ہوسکتا ہے۔ دراصل ان کی انگلیوں سے بننے والی شکل انگریزی حرف ’M‘ سے مشابہت رکھتی ہے، جو رومن ہندسوں میں ایک ہزار  کی علامت ہے۔ اس کے علاوہ پرتگالی زبان میں ایک ہزار کے لیے استعمال ہونے والا لفظ ’Mil‘ بھی حرف ایم سے شروع ہوتا ہے۔رپورٹس کے مطابق رونالڈو اپنے پیشہ ورانہ فٹبال کریئر میں اب تک ۹۸۵ ؍گول اسکور کرچکے ہیں اور تاریخی ایک ہزار گول کے سنگ میل تک پہنچنے کے لیے انہیں مزید ۱۵ ؍گول درکار ہیں۔ اگر وہ یہ ہدف حاصل کرلیتے ہیں تو وہ فٹبال کی تاریخ میں ایک ہزار آفیشل کریئر گول کرنے والے پہلے کھلاڑی بننے کا اعزاز حاصل کرسکتے ہیں۔ تاہم رونالڈو نے اپنے اس اشارے کو ایک ہزار گول کے ہدف سے جوڑنے کی باضابطہ تصدیق نہیں کی ہے۔


یہ پہلا موقع نہیں ہے جب رونالڈو نے ہاتھ سے یہ پراسرار اشارہ کیا ہو۔ اس سے قبل ۲۱ اکتوبر کو سعودی پرو لیگ میں نیوم کے خلاف النصر کی کامیابی کے بعد بھی وہ اسی انداز میں اشارہ کرتے ہوئے نظر آئے تھے۔ اس وقت النصر کلب نے بھی سوشل میڈیا پر ان کی ویڈیو شیئر کرکے مداحوں سے اس اشارے کا مطلب معلوم کرنے کی کوشش کی تھی۔بعد ازاں ۲۹؍ اکتوبر کو الخلود کے خلاف شاندار ہیٹ ٹرک کرنے کے بعد بھی رونالڈو نے یہی اشارہ دہرایا۔ ان کے بار بار ایسا کرنے سے یہ قیاس آرائیاں مزید تیز ہوگئی ہیں کہ اس کے پیچھے کوئی خاص پیغام یا ذاتی مقصد ہوسکتا ہے۔ بعض مداحوں نے اس اشارے کو ان کے بیٹے میٹیو کے نام کے پہلے حرف سے بھی جوڑا ہے، تاہم اس نظریے کی بھی کوئی تصدیق نہیں ہوئی ہے۔

یہ بھی پڑھئے:بی بی سی، سی این این اور زوم سمیت ۱۷۸؍ عالمی اداروں کی ویب سائٹس پر سائبر حملہ

دلچسپ بات یہ ہے کہ رونالڈو کے کلب النصر نے بھی اس معاملے کو مزید دلچسپ بنا دیا ہے۔ کلب کی جانب سے بھی پہلے اس پراسرار اشارے کی ویڈیو شیئر کرکے مداحوں کو اس کا مطلب بتانے کا چیلنج دیا گیا تھا۔ رونالڈو اور کلب دونوں کی جانب سے اس معاملے پر خاموشی برقرار رکھنے کے باعث سوشل میڈیا پر مختلف نظریات سامنے آرہے ہیں۔فی الحال نہ تو کرسٹیانو رونالڈو نے اور نہ ہی النصر کلب نے اس اشارے کی اصل وجہ واضح کی ہے۔ اس لیے ایک ہزار گول کے سنگ میل سے اس کا تعلق محض ایک مضبوط قیاس آرائی ہے۔
دوسری جانب سعودی پرو لیگ میں النصر کی نظریں اپنے اگلے اہم مقابلے پر مرکوز ہیں۔ ٹیم ۲۰؍ نومبر کو الاحلی کے خلاف میدان میں اترے گی۔ لیگ کی پوائنٹس ٹیبل میں النصر دوسرے مقام پر ہے اور سرفہرست الہلال سے دو پوائنٹس پیچھے ہے۔رونالڈو کے لیے یہ سیزن انفرادی طور پر بھی انتہائی اہمیت رکھتا ہے، کیونکہ ان کے سامنے ایک ہزار کیریئر گول مکمل کرنے کا تاریخی ہدف ہے۔ اب دیکھنا یہ ہوگا کہ ان کا پراسرار اشارہ واقعی اسی تاریخی سنگ میل کی جانب اشارہ ہے یا اس کے پیچھے کوئی اور راز پوشیدہ ہے۔ فی الحال رونالڈو نے اپنے مداحوں کو جواب دینے کے بجائے ایک دلچسپ سوال میں الجھا رکھا ہے۔ 

متعلقہ خبریں

This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK