اتوار کی فجر سے لےکرپیر کی شام تک غزہ پٹی پراسرائیلی فوج کی پےدرپے گولہ باری اوربمباری ،کئی عمارتیں تباہ، پناہ گزینوں کے خیموں پر بھی فائرنگ۔

قابض اسرائیلی فوج نے غزہ کی پٹی میں اپنے وحشیانہ حملوں اور خونریز جارحیت کا سلسلہ جاری رکھتے ہوئے شہریوں اور نقل مکانی کرنے والے افراد کو نشانہ بنایا، جس کے نتیجے میں اتوار کے روز فجر سے لے کر اب تک گولہ باری، بمباری اور عمارتوں کو نشانہ بنانے کے پے در پے سلسلوں میں ایک بچی سمیت۴؍فلسطینی شہید اور دیگر افراد زخمی ہو گئے۔ہمارے نامہ نگار نے اطلاع دی ہے کہ اتوار کی شام شمالی غزہ میں قابض اسرائیلی فوج کی فائرنگ سے ایک شہری شہید اور متعدد زخمی ہو گئے، یہ پیش رفت اسلامی تحریک مزاحمت ’حماس‘ اور قابض اسرائیل کے درمیان گزشتہ سال۱۰؍ اکتوبر کو نافذ ہونے والی جنگ بندی کے معاہدہ کی مسلسل خلاف ورزیوں  کے تناظر میں سامنے آئی ہے۔ذرائع کے مطابق محمد ناصر الدبس شمالی پٹی میں یمن السعيد اسپتال کے گردونواح میں اسرائیلی فوج کی گولیوں سے زخمی ہونے کے بعد جامِ شہادت نوش کر گئے ہیں۔انہوں نے اشارہ کیا کہ پٹی کے جنوب میں واقع شہر خان یونس کے وسط میں فرحانہ اسکول میں قابض فوج کی فائرنگ سے ایک نوجوان کے سر میں شدید نوعیت کی چوٹ آئی  ۔غزہ کی پٹی میں صبح کے اوقات سے ہی پے در پے میدانی کشیدگی دیکھنے میں آئی ہے جس کی جارحیت کا دائرہ کار سویلین گاڑیوں کو نشانہ بنانے، فلسطینیوں اور بے سہاروں کے خیموں پر براہ راست فائرنگ کرنے، توپ خانے اور فضائی بمباری کے ساتھ ساتھ ان انہدامی کارروائیوں تک پھیلا ہوا ہے۔

یہ بھی پڑھئے: حماس کے قائد پر اسرائیل کا قاتلانہ حملہ، بچ نکلنے کا دعویٰ

وسطی پٹی میں، دیر البلح شہر کے جنوب میں ایک اسرائیلی ڈرون کی طرف سے سویلین کار کو نشانہ بنائے جانے کے نتیجے میں ایک فلسطینی شہید اور۹؍افراد زخمی ہو گئے، جن میں ایک شخص کی حالت نازک بتائی جاتی ہے۔اسی طرح پٹی کے جنوب میں خان یونس شہر کے شمال مغرب میں اسرائیلی ڈرون کے ذریعے کیے جانے والے ایک فضائی حملے کے نتیجے میں ایک فلسطینی شہید ہو گیا۔

ایک اور سنگین جرم میں۶؍ سالہ بچی سھا محمدالصیایحہ دیر البلح کے جنوب میں واقع علاقے وادی السلقا میں اپنے نقل مکانی کے خیمے کے اندر قابض فوج کی گولیوں کا نشانہ بننے کے بعد شہید ہو گئی، جو کہ شہریوں اور پناہ گزین کیمپوں کو نشانہ بنانے والے حملوں کے سلسلے میں ایک اور اضافہ ہے۔شمالی پٹی میں بیت لاھیا میں قابض فوج کی فائرنگ سے متعدد فلسطینی زخمی ہو گئے، جبکہ فجر کے وقت غزہ کے شمال مغرب میں انجینئرز یونین کے صدر دفتر کے قریب اسرائیلی ڈرون  سے حملہ کیا گیا۔