آسٹریلیا انڈر۱۹؍ اورہندوستان انڈر ۱۹؍کے درمیان دوسرے ۴؍ روزہ میچ میں تیز گیند بازوں اور اسپنروں نے ابتدا سے اختتام تک دبدبہ برقرار رکھا۔

آسٹریلیا انڈر۱۹؍ اورہندوستان انڈر ۱۹؍کے درمیان دوسرے ۴؍ روزہ میچ میں تیز گیند بازوں اور اسپنروں نے ابتدا سے اختتام تک دبدبہ برقرار رکھا۔ یہ میچ محض دو دنوں میں مکمل ہو گیاجس میں ہندوستانی ٹیم نے شاندار جیت حاصل کی۔ پہلے میچ میں اگرچہ برسبین کی سازگار حالت میں آسٹریلوی بیٹنگ لائن خاص کارکردگی نہیں دکھا سکی تھی۔ اُس مقابلے میں میزبان ٹیم نے پہلی اننگز میں ۲۴۳؍اور دوسری میں ۱۲۷؍ رن بنائے تھے اور ایک اننگ اور۵۸؍رن سے شکست کا سامنا کیا تھا۔ آسٹریلیائی ٹیم نے اُس میچ میں واپسی کی کچھ کوششیں ضرور کیں لیکن دوسرے میچ میں ایسی کوئی کارکردگی دیکھنے کو نہیں ملی۔ صرف وکٹ کیپر بلے باز ایلکس لی ینگ نے زبردست بلے بازی کا مظاہرہ کیا تاہم، ان کے سوا کوئی اور بیٹر کریز پر نہیں ٹک سکا۔ 
انہوں نے میچ کی واحد نصف سنچری (پہلی اننگز میں ۶۶؍ رن) اسکور کی لیکن اس اننگز کے باوجود آسٹریلوی ٹیم۱۳۵؍ رن پر ڈھیر ہو گئی۔ دوسری اننگز اس سے بھی زیادہ مایوس کن ثابت ہوئی اور پوری ٹیم صرف۱۱۶؍ رن پر سمٹ گئی۔ اس طرح ہندوستان کو پہلی اننگز میں ۳۶؍ رن کی برتری حاصل ہوئی۔ کم اسکور والے میچ میں ہندوستان کو محض۸۱؍ رن کا ہدف ملا، جو اُس نے تین وکٹوں کے نقصان پر حاصل کر لیا۔ دوسرے دن ہندوستان نے اپنی پہلی اننگز۷؍ وکٹوں پر ۱۴۴؍ رن پر دوبارہ شروع کی۔ ہینل پٹیل اور دیپیش دیویندرن جلد ہی آؤٹ ہو گئے، جبکہ ہینل کے سی بارٹن کا چوتھا شکار بنے۔ ہندوستان کی اننگز۱۷۱؍ رن پر ختم ہوئی۔ آسٹریلیا کی جانب سے چارلس لیشمنڈ، وِل بائرَم اور جولیئن اوسبورن نے دو دو وکٹیں حاصل کیں۔ دوسری اننگز میں آسٹریلیا کا آغاز نہایت خراب رہا۔ صرف ۷؍ اووروں میں ۹؍ رن پر ۳؍ وکٹیں گر گئیں، ہینل نے ۲؍ جبکہ اودھو موہن نے ایک وکٹ حاصل کیا۔ اس کے بعد آسٹریلوی ٹیم دباؤ سے باہر نہ نکل سکی اور پوری ٹیم۴۰ء۱؍ اوورز میں ۱۱۶؍ رن پر آؤٹ ہو گئی۔ ہدف اگرچہ زیادہ بڑا نہیں تھا، لیکن پچ کی حالت دیکھتے ہوئے ہندوستان کے لیے جیت آسان نہیں سمجھی جا رہی تھی۔ ویبھَو سوریہ ونشی پہلی ہی گیند پر لیشمنڈ کا شکار ہو گئے، جبکہ کپتان آیوش مہاترے بھی ۱۳؍ رن پر بولڈ ہو گئے۔ تاہم وہان ملہوترا اور ویدانت تریویدی نے صرف ۶؍ اوورز میں ۴۹؍ رن کی شراکت کر کے میچ ہندوستانی کی جھولی میں ڈال دیا۔