ہندوستانی کرکٹ کنٹرول بورڈ (بی سی سی آئی) نے سنیچرکو نیوزی لینڈ کے خلاف ۵؍ میچوں کی ٹی۔۲۰؍ سیریز اور اس کے بعد ہونے والے مردوں کے ٹی۔۲۰؍عالمی کپ ۲۰۲۶ءکیلئے ہندوستان کی ۱۵؍ رکنی ٹیم کا اعلان کر دیا۔ ٹیم میں ایشان کشن اور رِنکو سنگھ کو شامل کیا گیا ہے جبکہ حال ہی میں زخمی ہونے والے شبھ من گِل کو ٹیم میں جگہ نہیں مل سکی۔

آج یہاں بی سی سی آئی کے سیکریٹری دیوجیت سیکیا، کپتان سوریہ کمار یادو اور چیف سلیکٹر اجیت آگرکر کے ساتھ میٹنگ کے بعد ۱۵؍رکنی ٹیم کا اعلان کیا گیا۔ حال ہی میں جنوبی افریقہ کے خلاف کھیلی گئی ۵؍میچوں کی ٹی۔۲۰؍سیریز میں شبھ من گِل نائب کپتان تھے اور چوتھے میچ سے قبل پریکٹس کے دوران انہیں چوٹ لگ گئی تھی۔ اس سال ٹی۔۲۰؍میں شبھ من گِل کی کارکردگی خاطر خواہ نہیں رہی۔ انہوں نے ۱۵؍ اننگز میں صرف ۲۹۱؍رن بنائےجبکہ ان کے نام کوئی نصف سنچری یا سنچری نہیں رہی۔

دوسری جانب سید مشتاق علی ٹرافی میں تقریباً ۲۰۰؍ کے اسٹرائیک ریٹ سے ۵۰۰؍سے زائد رن بنا کر جھارکھنڈ کو اپنی کپتانی میں چمپئن بنانے والے ایشان کشن کی ہندوستانی ٹیم میں واپسی ہوئی ہے۔ انہوں نے ٹورنامنٹ میں صرف ۱۰؍ اننگز میں ۵۱۷؍رن بنائے اور ان کا اسٹرائیک ریٹ ۱۹۷ء۳۲؍رہا۔ انہوں نے ۲؍ نصف سنچریاں اور ۲؍ سنچریاں بنائیں، جن میں ہریانہ کے خلاف فائنل میں بنائی گئی سنچری (۴۹؍ گیندوں پر ۱۰۱؍رن) بھی شامل ہے۔

چوٹ کے باعث جنوبی افریقہ کے خلاف آخری ۲؍ ٹی۔۲۰؍میچوں سے باہر رہنے والے اکشر پٹیل کو اب نائب کپتان مقرر کیا گیا ہے۔ ایشیا کپ میں فیصلہ کن شاٹ کھیلنے والے رِنکو سنگھ عالمی کپ کیلئے مرکزی ٹیم میں واپس آ گئے ہیں۔ واشنگٹن سندر بھی اس بار ٹیم کا حصہ ہیں۔ یہی ٹیم نیوزی لینڈ کے خلاف ہونے والی ۵؍ میچوں کی ٹی۔۲۰؍سیریز میں بھی کھیلے گی۔ سنجو سیمسن کے علاوہ ایشان کشن ٹیم کے دوسرے وکٹ کیپر ہوں گے۔ٹیم میں ۳؍ تیز گیندباز اور ۲؍ اسپنر شامل ہیں۔ جسپریت بمراہ تیز گیندبازی حملے کی قیادت کریں گے جبکہ عرشدیپ سنگھ اور ہرشت رانا دیگر ۲؍ تیز گیندباز ہیں۔ اسپن گیندبازوں میں ورون چکرورتی اور کلدیپ یادو شامل ہیں۔

ٹی۔۲۰؍عالمی کپ سے قبل ہندوستان نیوزی لینڈ کے خلاف ۳؍یک روزہ اور ۵؍ ٹی۔۲۰؍میچ کھیلے گا۔ ٹی۔۲۰؍ سیریز ۲۱؍ جنوری سے ۳۱؍جنوری تک کھیلی جائے گی۔ ۱۱؍ سے ۱۸؍ جنوری کے درمیان ہونے والے ۳؍یک روزہ میچوں کے لئے ٹیم کا اعلان بعد میں کیا جائے گا۔

سوریہ کمار یادو (کپتان)، ابھیشیک شرما، تلک ورما، شِوَم دوبے، ہاردک پانڈیا، کلدیپ یادو، واشنگٹن سندر، اکشر پٹیل (نائب کپتان)، رِنکو سنگھ، سنجو سیمسن (وکٹ کیپر)، ایشان کشن (وکٹ کیپر)، عرشدیپ سنگھ، ہرشت رانا، ورون چکرورتی اور جسپریت بمراہ۔