اسرائیل نے غزہ سے مصر علاج کیلئے جانے والے مریضوں کی تعداد ۱۳۶؍ سے ۶۱؍ کردی، غزہ کی وزارت صحت نے اس اقدام کو بلاجواز تعزیری پالیسیاں قرار دیا۔

غزہ کی وزارت صحت نے کہا کہ اسرائیلی حکام نے جمعرات کو غزہ سے مصر میں طبی علاج کے لیے جانے کی اجازت پانے والے مریضوں اور زخمی فلسطینیوں کی تعداد۱۳۶؍ سے کم کر کے۶۱؍ مریض اور ان کے ساتھی کر دی۔ایک بیان میں، وزارت نے کہا کہ،’’۱۳۶؍ مریضوں اور ان کے ساتھیوں کے ایک گروپ کو سفر کرنے کی سرکاری منظوری ملی تھی اس سے پہلے کہ اسرائیلی حکام نے تعداد کو کم کر کے۷۲؍ مریض اور ساتھی کر دیا اور باقی معاملات کو واپس بھیج دیا۔‘‘

یہ بھی پڑھئے: امریکہ کا محمود عباس کو ویزا دینے سے انکار، اقوامِ متحدہ سے ویڈیو خطاب متوقع

وزارت کے اس اقدام پر اعتراض اور مریضوں کی نقل و حمل شروع ہونے کے باوجود، اسرائیلی فریق نے درخواست کی کہ اضافی۱۱؍ مریضوں اور ساتھیوں کو بھی واپس کیا جائے، جس سے جانے کی اجازت پانے والوں کی حتمی تعداد۶۱؍ ہو گئی۔حالانکہ وزارت نے زور دیا کہ گروپ میں شامل مریضوں اور زخمی فلسطینیوں کو مصر میں فوری خصوصی طبی دیکھ بھال کی ضرورت ہے۔تاہم اس پیش رفت کے بعد، وزارت نے روانگی کو ایمبولینس کے ذریعے منتقل کیے جانے والے شدید بیمار مریضوںتک محدود کرنے اور باقی مریضوں کو بلاجواز تعزیری پالیسیوں کے خلاف اجتماعی احتجاج کے طور پر واپس کرنے کا فیصلہ کیا۔
بعد ازاں وزارت نے کہا کہ یہ اقدام طبی علاج کے حق کی صریح خلاف ورزی ہے اور سینکڑوں مریضوں کو بروقت خصوصی اسپتالوں تک پہنچنے سے منظم طریقے سے روک کر موت کے خطرے سے دوچار کرتا ہے۔مزید برآں اس نے عالمی ادارہ صحت، اقوام متحدہ کے ہائی کمشنر برائے انسانی امور اور دیگر بین الاقوامی اداروں سے مطالبہ کیا کہ وہ فوری مداخلت کریں اور اسرائیلی حکام پر من مانی پابندیوں کو ختم کرنے کے لیے دباؤ ڈالیں۔ساتھ ہی وزارت نے اسرائیل سے یہ بھی مطالبہ کیا کہ وہ اکتوبر میں شرم الشیخ میں طے پانے والی مفاہمت کے مطابق تمام مریضوں کی روانگی میں مکمل سہولت فراہم کرے، اور زور دیا کہ بیرون ملک علاج کے لیے بھیجے گئے تمام مریضوں کو مستقبل کے گروپوں میں بغیر کسی پابندی یا اخراج کے جانے کی اجازت دی جائے۔

یہ بھی پڑھئے: غزہ میں عمارت منہدم، کم از کم۲۰؍ فلسطینی جاں بحق، متعدد ملبے تلے دبے

ـذہن نشین رہے کہ ، اکتوبر۲۰۲۳ء سے غزہ میں اسرائیل کی فوجی مہم میں۷۳؍ ہزار  سے زیادہ فلسطینی ہلاک اور۱۷۴۰۰۰؍ سے زیادہ زخمی ہوئے ہیں، جن میں زیادہ تر خواتین اور بچے ہیں۔چونکہ غزہ کے اسپتال اسرائیل کے ذریعے تباہ کئے جاچکے ہیں، لہٰذا شدید زخمیوں کو مزید علاج کیلئے مصر بھیجا جاتا ہے، جس کی تعداد بھی اسرائیل نے مختصر کردی ہے۔