چمپئن لیگ کے سیمی فائنل کا دوسرا مرحلہ ویلا ریئل کے گھریلو میدان پر۔ لیورپول نے پہلا مرحلہ جیتا تھا
:چمپئن لیگ کے سیمی فائنل کے دوسرے مرحلے کے میچ میں منگل کی دیر رات لیورپول کی ٹیم ، ویلا ریئل کی میزبانی میں کھیلے گی۔ سیمی فائنل کے دوسرے مرحلے میں لیورپول کو صفر۔۲؍ گول کی برتری حاصل رہے گی۔ لیورپول فٹبال کلب نے اپنے گھریلو میدان اینفیلڈ پر صفر۔۲؍ سے کامیابی حاصل کی تھی اور وہ ویلا ریئل کے میدان پر بھی کامیابی حاصل کرتے ہوئے فائنل میں جگہ بنانا چاہے گا۔
لیورپول کے پاس اس وقت مضبوط ٹیم ہے اور اس کے سبھی کھلاڑی گول کرنے کی صلاحیت رکھتے ہیں۔ اس لئے اس میچ میں لیورپول کا پلڑا بھاری رہے گا۔لیورپول اس وقت ای پی ایل کے ٹیبل پردوسرے نمبرپر ہے اور وہ ٹاپ پر موجود مانچسٹر سٹی سے ایک پوائنٹ پیچھےہے۔ امسال لیورپول کی ٹیم نے اچھا مظاہرہ کیاہے۔ ا س سیزن میں اس نے لیگ کپ جیتاہے، ایف اے کپ کے فائنل میں ہے ، انگلش لیگ کے ٹیبل پر دوسرے نمبرپر ہے اور چمپئن لیگ کے سیمی فائنل میں کھیل رہا ہے۔پریمیر لیگ کے گزشتہ میچ میں اسے نیوکیسل یونائٹیڈ فٹبال کلب کو شکست دینے کیلئے جدوجہد کرنی پڑی تھی حالانکہ اس نے یہ میچ صفر۔ ایک گول سے جیت لیا تھا۔
دوسری طرف ویلا ریئل لالیگا کے ٹیبل پر ۷؍ویں نمبر پر ہے اور اس کے کھیل میں تسلسل نہیں ہے۔اسپینش فٹبال کلب کبھی اچھا کھیل رہا ہے اور کبھی خراب۔ گزشتہ ہفتے اسے لالیگا کے میچ میں ڈیپورٹیو الویس فٹبال کلب کے ہاتھوں ۱۔۲؍ گول سے شکست کا سامنا کرناپڑا تھا۔ اس شکست کی وجہ سے اسے ۲؍پوائنٹس کا نقصان ہواہے۔ اس کی کوشش ہوگی کہ وہ دوسرے مرحلے کے میچ میں لیورپول کو ہرا دے ۔
لیورپول اور ویلا ریئل کے درمیان ۴؍ میچ ہوئے ہیں اوران میں سے ۲؍میچ لیورپول نے جیتے ہیں۔ ویلا ریئل کو ایک میچ میں کامیابی نصیب ہوئی ہے۔ ان دونوںکے درمیان گزشتہ مقابلہ اینفیلڈکے میدان پر چمپئن لیگ کے سیمی فائنل کا پہلا مرحلہ تھا۔ مجموعی طورپر دیکھیں تو گزشتہ ۵؍میچوںمیں ویلا ریئل نے ۲؍میچ ہارے ہیں، ۲؍ میچ جیتے ہیں اور ایک میچ ڈرا کیاہے۔ لیورپول نے گزشتہ ۵؍ میچ جیتے ہیں۔
