ارجنٹائنا کے عظیم فٹبالر لیونل میسی اور پرتگال کے سپر اسٹار کرسٹیانو رونالڈو کے درمیان کئی برسوں سے جاری مقابلہ اب مالی میدان میں بھی دلچسپ رخ اختیار کرچکا ہے۔

ارجنٹائنا کے عظیم فٹبالر لیونل میسی اور پرتگال کے سپر اسٹار کرسٹیانو رونالڈو کے درمیان کئی برسوں سے جاری مقابلہ اب مالی میدان میں بھی دلچسپ رخ اختیار کرچکا ہے۔ تازہ اعداد و شمار کے مطابق ۲۰۲۶ء میں رونالڈو کی متوقع آمدنی تقریباً ۳۰؍ کروڑ ڈالر ہے، جبکہ میسی کی آمدنی تقریباً ۱۵؍ کروڑ ڈالر بتائی گئی ہے۔ اس طرح رونالڈو ایک سال کی آمدنی میں میسی سے تقریباً ۱۵؍ کروڑ ڈالر آگے ہیں۔

یہ بھی پڑھئے:فیروز خان کو بالی ووڈ کے سب سے زیادہ اسٹا ئلش ہیرو کے طور پر جانا جاتا ہے

رپورٹ کے مطابق رونالڈو کی مجموعی متوقع آمدنی میں تقریباً ۲۵؍ کروڑ ڈالر میدان کے اندر سے حاصل ہونے والی رقم شامل ہے  جبکہ تقریباً ۵؍ کروڑ ڈالر تشہیری معاہدوں، کاروباری سرگرمیوں اور دیگر ذرائع سے آنے کی توقع ہے۔ سعودی عرب کے کلب النصر کے لیے کھیلنے والے ۴۱؍ سالہ رونالڈو نے گزشتہ برسوں میں فٹبال کے ساتھ اپنے کاروباری دائرے کو بھی نمایاں طور پر وسعت دی ہے۔ دوسری جانب ۳۹؍ سالہ میسی امریکی کلب انٹر میامی سے وابستہ ہیں۔ ان کی متوقع سالانہ آمدنی تقریباً ۱۵؍ کروڑ ڈالر ہے، جس میں تقریباً ساڑھے ۷؍ کروڑ ڈالر میدان کے اندر کی آمدنی اور اتنی ہی رقم تشہیری و کاروباری سرگرمیوں سے حاصل ہونے کا اندازہ ہے۔
مالی اعتبار سے دونوں کھلاڑی اب دنیا کے انتہائی کامیاب اور دولت مند کھلاڑیوں میں شمار ہوتے ہیں۔ فوربس کے مطابق ۲۰۲۶ء میں میسی کی مجموعی دولت کا تخمینہ تقریباً ۱۱۰؍ کروڑ ڈالر اور رونالڈو کی دولت کا تخمینہ تقریباً ۱۲۰؍کروڑ ڈالر ہے۔ رونالڈو نے ۲۰۲۶ء میں ایک فعال کھلاڑی کی حیثیت سے دو ارب ڈالر سے زیادہ مجموعی پیشہ ورانہ آمدنی حاصل کرنے والے پہلے کھلاڑی کا اعزاز بھی حاصل کیا۔

یہ بھی پڑھئے:اسرائیل میں امریکی فوجی کمک بڑھانے کی تیاری

رونالڈو کی مالی برتری کی ایک بڑی وجہ سعودی کلب النصر کے ساتھ ان کا انتہائی بڑا معاہدہ ہے۔ فوربس کے مطابق النصر رونالڈو کو سالانہ ۲۰؍ کروڑ ڈالر سے زیادہ ادا کرتا ہے، جس نے انہیں مسلسل کئی برس دنیا کے سب سے زیادہ معاوضہ لینے والے کھلاڑیوں میں سرفہرست رکھنے میں اہم کردار ادا کیا ہے۔میسی کی دولت اور آمدنی کا بڑا حصہ اگرچہ کھیل کے معاہدوں کے ساتھ تشہیری شراکت داریوں اور کاروباری منصوبوں سے بھی آتا ہے۔ وہ کئی عالمی تجارتی اداروں کے ساتھ طویل مدتی معاہدے رکھتے ہیں، جبکہ ان کے پاس جائیداد اور ہوٹل کے کاروبار میں بھی سرمایہ کاری موجود ہے۔ فوربس کے مطابق میسی نے اپنے پورے پیشہ ورانہ سفر میں کھیل اور کھیل سے باہر کی سرگرمیوں سے مجموعی طور پر تقریباً  ۱۸۰؍ کروڑ ڈالر کمائے ہیں۔
 فٹبال کی تاریخ کی اس مشہور جوڑی کے درمیان مقابلہ صرف گول، اعزازات اور ریکارڈ تک محدود نہیں رہا بلکہ مالی میدان میں بھی دونوں کی دوڑ جاری ہے۔ موجودہ اعداد و شمار میں رونالڈو سالانہ آمدنی کے اعتبار سے واضح طور پر آگے ہیں، جبکہ میسی بھی اپنی کھیل کی کمائی، عالمی تشہیری مقبولیت اور کاروباری سرمایہ کاری کے باعث دنیا کے امیر ترین فعال کھلاڑیوں میں شامل ہیں۔